საქართველოში მაღალი ინფლაციაა, რაც ხაჭაპურის გამოცხობის ღირებულებაზეც აისახება. ISET-ის ინფორმაციით, ბოლო ერთ წელში სტანდარტული იმერული ხაჭაპურის მომზადება 28%-ით არის გაძვირებული.

რატომ არის მნიშვნელოვანი: ივნისის მდგომარეობით, საქართველოში წლიური ინფლაცია 12,8% იყო. ინდექსი ხაჭაპურის მომზადებისთვის საჭირო ინგრედიენტების მიხედვით გამოითვლება, თუმცა ინფლაციის საერთო სურათს მაინც ნათლად აჩვენებს.

დეტალები: თსუ-ის ეკონომიკის საერთაშორისო სკოლა წერს, რომ მიმდინარე წლის ივნისში ერთი სტანდარტული იმერული ხაჭაპურის მომზადების საშუალო ღირებულება 5,39 ლარი იყო, რაც 2,7%-ით ნაკლებია 2022 წლის მაისის მაჩვენებელზე და 28,1%-ით არის გაზრდილი წლიურ ჭრილში.

  • კვლევის მხიედვით, 2021 წლის ივნისთან შედარებით ხაჭაპურის ყველა ინგრედიენტის ფასი გაზრდილია.
  • როგორც ირკვევა, ივნისში ხაჭაპურის ინდექსის ინფლაციის ძირითადი მიზეზი ყველი იყო, რომლის ფასიც 27,8%-ით არის გაზრდილი და რომელზეც ინდექსის ყველაზე მაღალი წონა მოდის.
  • ISET-ის მიხედვით, ბოლო ერთ წელში 46,1%-ით არის გაზრდილი ფქვილის ფასი.
  • ამასთან, ფასები გაიზარდა სხვა ინგრედიენტების შემთხვევაშიც: კვერცხი (+38,9%), კარაქი (+22,7%), რძე (+13,9%), საფუარი (+13%).

ISET წერს, რომ საკვები პროდუქტების ფასების ზრდას რამდენიმე ფაქტორმა შეუწყო ხელი:

  • უკრაინაში მიმდინარე ომმა და მიწოდების ჯაჭვებში არსებულმა სირთულეებმა სასურსათო პროდუქტების დეფიციტი გამოიწვია.
  • ასევე, სასუქებისა და ენერგეტიკული ხარჯებიც იზრდება, რაც დამატებითი წნეხია ადგილობრივ ფასებზე.

ფართო სურათში: საქართველოში სურსათის ფასების ინფლაციაზე საერთაშორისო ფასებმაც იმოქმედა.

  • ეკონომიკის საერთაშორისო სკოლა FAO-ის მონაცემებს ეყრდნობა და წერს, რომ ბოლო 3 თვეში სურსათის ფასები დაეცა და 2022 წლის ივნისში წლიურმა ინფლაციამ 23,1% შეადგინა.
  • კვლევის მიხედვით, საერთაშორისო ფასების ვარდნა, როგორც წესი, ადგილობრივ ბაზრებს დაგვიანებით გადაეცემა, თუმცა, თუ კლების ტენდენცია გაგრძელდება და საერთაშორისო ფასები დასტაბილურდება, საქართველოში სურსათის ფასებზე არსებული წნეხი შეიძლება შერბილდეს.