სკოლაში სასწავლო წლის დასრულება ყოველთვის განსაკუთრებულ სიხარულს უკავშირდება. ამ შესანიშნავი ამბის აღსანიშნავად აშშ-ის სკოლებში ერთგვარ სამახსოვრო ალბომებს უშვებენ, სადაც მათი მოსწავლეების ფოტოები და სახალისო წარწერებია თავმოყრილი.

თუმცა, წელს ეს ამბავი სახალისო სულაც არ აღმოჩნდა 12 წლის კოლორადოელი ბიჭის, ბროდი რიდერისთვის, რომელსაც ალბომში სამახსოვრო წარწერა ორი მასწავლებლის გარდა არავინ დაუტოვა — მათ შორის, არც თანაკლასელებმა. მართალია, ბროდის თანაკლასელებთან დამეგობრება გაუჭირდა, თუმცა, სოციალურ ქსელში გამოქვეყნებულმა მისმა ამბავმა ასობით ადამიანის ყურადღება მიიქცია. ერთ-ერთი მათგანი არაერთი პრიზის მფლობელი ამერიკელი მსახიობი, პოლ რადი, აღმოჩნდა.

რადმა, რომელსაც მაყურებლები ყველაზე მეტად მარველის კინოსამყაროს სუპერგმირად, ადამიან-ჭიანჭველად, იცნობენ, ბროდის გამხნევება გადაწყვიტა. 12 წლის ბიჭს კინოვარსკვლავი ჯერ ვიდეოზარით ესაუბრა, შემდეგ კი ადამიანი-ჭიანჭველას ხელმოწერილი ჩაფხუტი და წერილი გაუგზავნა.

ფოტო: Cassandra Cooper / Facebook

"ჩემს კარგ მეგობარს, ბროდის, იმ დროისთვის, როცა იგი სამყაროს სძლევს", — წერია ჩაფხუტზე.

მსახიობისა და მოსწავლის დამეგობრების შესახებ ინფორმაცია ფეისბუქზე გაავრცელა ბროდის დედამ, კასანდრა კუპერმა. მან ასევე გაასაჯაროვა ხელით დაწერილი ბარათი, რომელიც რადმა პატარა მეგობარს გაუგზავნა.

ფოტო: Cassandra Cooper / Facebook

"ძვირფასო ბროდი,

იმ დღეს შენთან ლაპარაკით ძალიან ვისიამოვნე. მნიშვნელოვანია, გახსოვდეს, რომ მაშინაც კი როცა ცხოვრება რთულია, სიტუაცია მაინც იცვლება ხოლმე უკეთესობისკენ. უამრავი ადამიანი არსებობს, ვისაც უყვარხარ და ვინც ფიქრობს, რომ ყველაზე მაგარი ტიპი ხარ — ერთ-ერთი მათგანი მე ვარ. ერთი სული მაქვს, როდის ვნახავ ყველა იმ საოცრებას, რომელსაც შენ მიაღწევ,

შენი მეგობარი პოლი".

კასანდრას პოსტიდან ისიც შევიტყვეთ, რომ კინოვარსკვლავს და ბროდის ინტერნეტით ახლა უკვე აქტიური მიმოწერა აქვთ. ბროდი პოლს სწერს, რომ იგი მისი საყვარელი სუპერგმირია. პასუხად, რადი პატარა მეგობარს იმავეს ეუბნება.

ფოტო: Cassandra Cooper / Facebook

ბროდის ამბის შესახებ ინტერნეტმომხმარებლებმა მაისის ბოლოს შეიტყვეს. კასანდრა იხსენებს, რომ მისი შვილი ძალიან დასევდიანებული იყო და მხოლოდ მუსიკის მოსმენა სურდა. როცა მან წლის შემაჯამებელ ალბომზე ჰკითხა, ბიჭს თვალები ცრემლით აევსო და უპასუხა, რომ ყველამ, ვისაც კი მასში წარწერის გაკეთება სთხოვა, უარით უპასუხა.

"ძალიან ჭკვიანია და თანატოლებს მასთან ურთიერთობა უჭირთ", — ამბობს დედა და ამატებს, რომ ბროდის თანაკლასელები ასევე დასცინიან "დიდი ყურებისა" და იმის გამო, რომ "ძალიან გამხდარია".

12 წლის ბიჭმა თავისი თავისთვის მიწერილ წერილში ინატრა, რომ მეგობრები გაეჩინა. ეს ნატვრა კი მალევე აუხდა — ჰოლივუდის ვარსკვლავზე რომ აღარაფერი ვთქვათ, ამბის გახმაურების შემდეგ, ბროდის წლის შემაჯამებელ ალბომში სამახსოვრო და გამამხნევებელი წარწერების დატოვება უფროსკლასელებმაც გადაწყვიტეს.

უფროსკლასელებს კი მათაც მიბაძეს, ვინც წინათ უარს ამბობდა ბროდისთან მეგობრობაზე. კასანდრას თქმით, მისი შვილი ახლა სიხარულით "მეცხრე ცაზეა".

ბედნიერ მოზარდს ახლა ერთი სული აქვს, როდის დაიწყება ახალი სასწავლო წელი.

ასევე იხილეთ: