კარლოვი ვარის 56-ე საერთაშორისო კინოფესტივალის დაჯილდოება 9 ივლისს ჩეხეთში გაიმართა, რომლის ერთ-ერთი ნომინაციის გამარჯვებულებად ქართველი მსახიობი ქალები დასახელდნენ. წლევანდელ კინოფესტივალზე ქალის როლის საუკეთესოდ შესრულებისთვის ჯილდო ორად გაიყო და ამ ნომინაციის გამარჯვებულებად თაკო მუმლაძე და მარიამ ხუნდაძე დაასახელეს.

ქართველმა მსახიობმა ქალებმა ეს ჯილდო რეჟისორ იოსებ ბლიაძის ფილმში, სახელად ჩემი ოთახი, შესრულებული როლებისთვის მოიპოვეს. ფილმი პანდემიის პერიოდში ორი ახალგაზრდა გოგოს ცხოვრების შესახებ გვიყვება, რომელთა როლებს თაკო მუმლაძე და მარიამ ხუნდაძე ასრულებენ.

ფოტო: Facebook

კარლოვი ვარის საერთაშორისო კინოფესტივალი აღმოსავლეთ ევროპაში ერთ-ერთი წამყვანი კინომოვლენაა, რომელიც ყოველწლიურად ტარდება. წლევანდელ დაჯილდოებაზე საუკეთესო ფილმად ირანელი კინორეჟისორის, სადაფ ფორუღის, ზაფხული იმედით დაასახელეს.

შეგახსენებთ, რომ რეჟისორ სოსო ბლიაძის პირველი სრულმეტრაჟიანი მხატვრული ფილმი ოთარის სიკვდილი 2021 წელს თბილისის საერთაშორისო კინოფესტივალზე საუკეთესო ფილმად დასახელდა, ხოლო კარლოვი ვარის საერთაშორისო კინოფესტივალზე კრიტიკოსთა პრიზის მფლობელი გახდა.