პარტია საქართველოსთვის ერთ-ერთი ლიდერი, ნათია მეზვრიშვილი აცხადებს, რომ პროცესში მონაწილეობას მიიღებენ იმის მიუხედავად, რომ ამ დრომდე უცნობია მმართველი პარტიის დაანონსებული ფორმატის ფარგლები და რეალური მიზნები.

რატომ არის მნიშვნელოვანი: ქართულმა ოცნებამ ევროკომისიის რეკომენდაციების შესრულების მათეული გეგმა წარადგინა.

  • "ოცნების" ფორმატს ოპოზიციის ნაწილი კრიტიკულად აფასებს.
  • სამოქალაქო საზოგადოება მიიჩნევს, რომ მმართველი პარტიის გეგმა არაეფექტურია და ეროვნული თანხმობის მთავრობის შექმნას ითხოვს.

მეზვრიშვილის თქმით, პროცესს შეუერთდებიან, რათა გამოიყენონ "თუნდაც მცირედი შესაძლებლობა" ქვეყნის, მათ შორის ქუჩაში გამოსული მოქალაქეების მიზნის მისაღწევად.

  • "ამავდროულად არ მივცეთ ხელისუფლებას შესაძლებლობა, რომ ეს ფორმატები მხოლოდ ფასადურად და ძალაუფლების შესანარჩუნებლად გამოიყენოს".

დეტალები: ხვალ, 7 ივლისს შალვა პაპუაშვილი საპარლამენტო ოპოზიციასთან შეხვედრას და დეპოლარიზაციის საკითხის განხილვას გეგმავს.

  • "სადაც შემიშვებენ, ყველგან მივიღებ მონაწილეობას იქამდე, სანამ იქიდან გამომაგდებენ ჩემი ხასიათების გამო", — თქვა გირჩის ლიდერმა, იაგო ხვიჩიამ.
  • "თუ დაინიშნება საგანგებო სხდომა, სადაც განისაზღვრება კონკრეტული კანონპროექტები რასაც კენჭს უყრის პარლამენტი და მხარს დაუჭერს, რომ მოთხოვნების შესრულება დაიწყოს, ამაზე საუბრისთვის შესაძლოა, ვიყოთ მზად, მაგრამ კომისიებში მუშაობის თაობაზე შეხვედრებში მონაწილეობას არ ვაპირებთ", — ამბობს ლელოს ერთ-ერთი ლიდერი, სალომე სამადაშვილი.
  • "მე არ მინახავს ჯერ დოკუმენტი, სადაც წერია, რას როგორ აპირებენ. აქედან გამომდინარე, აუცილებლად დავესწრები შეხვედრას და მოვისმენ რა ხედვა აქვთ", — განაცხადა მოქალაქეების ერთ-ერთმა ლიდერმა, ლევან იოსელიანმა.