ეროვნულ დემოკრატიული ინსტიტუტის (NDI) მიერ გამოკითხულთა 42 პროცენტის მოსაზრებით, საბჭოთა კავშირის დაშლა ცუდი მოვლენა იყო, ხოლო 48 პროცენტს საპირისპირო მოსაზრება აქვს. 10-მა პროცენტმა ამ კითხვაზე პასუხი არ იცის. ეს არის მთელი საქართველოს მასშტაბით ჩატარებული კვლევის შედეგები, თუმცა, ქალაქებისა და სოფლების მიხედვით, აღნიშნული მაჩვენებელი განსხვავებულია.

საბჭოთა კავშირის დაშლას ცუდ მოვლენად მიიჩნევს სოფლად მცხოვრები მოსახლეობის 50 პროცენტი, პატარა ქალაქებში - 44 პროცენტი, დიდ ქალაქებში 30 პროცენტი, ხოლო თბილისში - 34 პროცენტი.

საბჭოთა კავშირის დაშლა კარგ მოვლენად მიაჩნია თბილისში მცხოვრებთა 58 პროცენტს, სოფლად მცხოვრებთა 43 პროცენტს, დიდ ქალაქებში - 56 პროცენტი, პატარა ქალაქებში - 47 პროცენტი.

აღნიშნული კვლევის მნიშვნელოვანი მიგნებაა ისიც, რომ იმ ადამიანთა დიდი ნაწილი, ვინც საბჭოთა კავშირის დაშლას ცუდ მოვლენად მიიჩნევს, ემხრობა საქართველოს ევროკავშირში გაწევრიანებას.

კვლევის საველე სამუშაოების NDI-ის დაკვეთით CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოიკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.