NDI-ის კვლევის მიხედვით, 18-35 წლის ასაკობრივ ჯგუფში ყოველი მეხუთე ადამიანი მიიჩნევს, რომ რუსეთში დემოკრატიაა. ამ ასაკობრივ კატეგორიაში გამოკითხულთა 21 პროცენტი დადებით პასუხს სცემს კითხვას: "რუსეთში ამჟამად არის დემოკრატია?" ეს მაჩვენებელი ყველა სხვა ასაკობრივ კატეგორიაში დადებითი პასუხების მაჩვენებლის წილს უსწრებს.

ამავე კითხვას, სხვა ასაკობრივ ჯგუფებთან შედარებით, წილობრივად ყველაზე ნაკლებმა გამოკითხულმა (46%) 18-35 წლის ადამიანებმა უპასუხეს, რომ რუსეთში დემოკრატია არაა.

რაც შეეხება სხვა ასაკობრივ კატეგორიებს. კითხვაზე: "რუსეთში ამჟამად არის დემოკრატია?" ასაკობრივი ჯგუფებიდან ყველაზე მეტმა (56%) პასუხი "არა" 36-55 წლის ადამიანებმა უპასუხეს. ამავე ასაკობრივ ჯგუფში გამოკითხული ადამიანების მხოლოდ 10 პროცენტი მიიჩნევს, რომ რუსეთში დემოკრატიაა. მესამე ასაკობრივ კატეგორიაში (56 წელი და ზემოთ) ადამიანების თითქმის ნახევარი (51%) მიიჩნევს, რომ რუსეთში დემოკრატია არა, თუმცა, 15 პროცენტი ფიქრობს რომ არის.

სამივე ასაკობრივ კატეგორიაში პასუხი "არ ვიცი" თითქმის იდენტურია, და გამოკითხულთა მესამედი პასუხობს (33-34%).

კვლევის საველე სამუშაოების NDI-ის დაკვეთით CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოიკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.