უკრაინელი სტუდენტი ნებისმიერ დაინტერესებულ პირს სთავაზობს შესაძლებლობას, რომ მისთვის სასურველი შეტყობინება წააწერონ იმ ნაღმზე, რომელსაც უკრაინაში შეჭრილი რუსეთის სამხედრო ძალებს ესვრიან.

ამის შესახებ გამოცემა Insider წერს, რომელიც ამ იდეის ავტორს, ქალაქ ჩერკასიში მცხოვრებ 22 წლის სტუდენტს, ანტონ სოკოლენკოს დაუკავშირდა და პირადად მისგან გაიგეს, თუ როგორ შეძლო მან ამ წამოწყებით უკრაინის შეიარაღებისთვის ათასობით დოლარის შეგროვება.

ანტონმა სხვადასხვა სოციალურ მედიაში, მათ შორის Reddit-ზე, გაავრცელა სარეკლამო შეთავაზებები: "შანსი გაქვთ, ორკები დახოცოთ 82-მილიმეტრიანი საარტილერიო ჭურვებით, რომლებზეც თქვენს სასურველ ტექსტს წააწერენ და ისე ესვრიან რუს ჯარისკაცებს".

ამ შეთავაზებით საკმაოდ ბევრი დაინტერესდა და ანტონმა შეკვეთები მიიღო ბელგიიდან, გერმანიიდან, ავსტრალიიდან და სხვა ქვეყნებიდან ისეთი წარწერების თხოვნით, როგორებიცაა "სიყვარულით ალბანეთიდან" და "გილოცავთ მამის დღეს".

ფოტო: Anton Sokolenko

ანტონ სოკოლენკო აღნიშნავს, რომ ეს დამოუკიდებელი ინიციატივაა და მასში უკრაინის ოფიციალური სამხედრო პირები გარეულები არ არიან. ის დამკვეთებს ჭურვების გასროლამდე შესრულებული წარწერების დამადასტურებელ ფოტოებს უგზავნის, ოღონდ ისე, რომ უკრაინელი ჯარისკაცების იდენტობა და ადგილმდებარეობა ანონიმური რჩება.

სოკოლენკოს თქმით, ის შეკვეთებს ონლაინ იღებს, ძირითადად Telegram-ის საშუალებით და შემოსულ ფულს მთლიანად ადგილობრივ არასამთავრობო ორგანიზაციას ურიცხავს, რომელიც უკრაინული შეიარაღების დასახმარებლად მუშაობს. სწორედ ამ ორგანიზაციამ — ჯარის, ვეტერანებისა და მათი ოჯახების დახმარების ცენტრმა — ასევე დაუდასტურა გამოცემა Insider-ს, რომ ანტონმა უკვე 18 000 დოლარზე მეტი გადაურიცხა მათ.

ფოტო: Reddit

ომის დაწყებისას ანტონ სოკოლენკო სხვა ბევრი თანამემამულის მსგავსად მოლოტოვის კოქტეილებს აკეთებდა, მაგრამ მოგვიანებით უფრო საჭირო საქმით დაკავება გადაწყვიტა.

"საკმარისად მამაცი არ ვარ, რომ ვიომო, ამიტომ რაც შემიძლია, იმას ვაკეთებ, რათა ჩვენს ჯარისკაცებს დავეხმარო და მტრები დავხოცო", — ამბობს ის.

არა მხოლოდ თავისი წამოწყების, არამედ უკრაინის შეიარაღებული ძალების შესახებ ინფორმაციას მუდმივ რეჟიმში ტელეგრამის გვერდზე ავრცელებს, რომელსაც უკვე ათასობით გამომწერი ჰყავს.

მარცხნივ ანტონ სოკოლენკო და ამ იდეის განმახორციელებელი კიდევ ერთი უკრაინელი მოხალისე, რომელსაც ხელში დაჭერილ ფურცელზე მათი ტელეგრამის მისამართი უწერია. მარჯვენა ფოტოზე კი უკრაინის შეიარაღების დასახმარებლად მათი წამოწყებული პროექტის სარეკლამო ტექსტია.

ფოტო: Anton Sokolenko

კითხვას, რამდენად ეთიკურია მისი ეს პროექტი, სოკოლენკომ ასე უპასუხა:

"ცოტათი პროვოკაციული კითხვაა, მაგრამ როგორც უკრაინელმა, შემიძლია ვთქვა, რომ რაც მეტი რუსი ჯარისკაცი მოკვდება, მით უფრო ბედნიერი ვიქნები".