2022 წლის პირველი კვარტლის მდგომარეობით, საქართველოში საშუალო ნომინალური ხელფასის მოცულობა 1 446,5 ლარს გაუტოლდა. ეს ნიშნავს იმას, რომ ბოლო ერთ წელში ქვეყანაში ხელფასები საშუალოდ 190,3 ლარით არის გაზრდილი.

რატომ არის მნიშვნელოვანი: საქართველოს მოსახლეობის შემოსავლების თითქმის ნახევარს დაქირავებიდან მიღებული ხელფასები შეადგენს.

  • საშუალო ხელფასის მოცულობა ქვეყნის მოსახლეობის ცხოვრების დონეზე მნიშვნელოვნად აისახება.

დეტალები: საქმიანობის სახეების მიხედვით, ყველაზე მაღალი ხელფასი — 3 037 ლარი საფინანსო და სადაზღვევო სფეროში ფიქსირდება.

  • რეგიონებს შორის ყველაზე მაღალი ხელფასი თბილისში (1 675 ლარი), მცხეთა-მთიანეთსა (1 319 ლარი) და ქვემო ქართლშია (1 231 ლარი).

კვლევა კიდევ ერთხელ აჩვენებს ქვეყანაში არსებულ გენდერულ უთანასწორობას. ბოლო მონაცემებით, კაცების საშუალო ხელფასი ქალებისას 510 ლარით აღემატება.

  • პირველ კვარტალში ქალების საშუალო ხელფასი 1 184,8 ლარი, ხოლო კაცების — 1 695,4 ლარი იყო.

კონტექსტი: საქართველოში საშუალო ნომინალური ხელფასი საშუალო არითმეტიკულის პრინციპით გამოითვლება.

  • მიმდინარე წლის პირველი იანვრიდან საჯარო სექტორში დასაქმებულებს ხელფასები 10%-ით გაეზარდათ, რამაც საშუალო ნომინალური ხელფასის ზრდაზე გავლენა მოახდინა.
  • ხელფასების ზრდაზე გავლენა ინფლაციამაც იქონია — მიმდინარე წლის პირველ კვარტალში საქართველოში საშუალოდ 13%-იანი ინფლაცია იყო.