ფაშიზმზე გამარჯვების 72 წლისთავი ვაკის პარკში (ფოტოები)

დღეს, თბილისში, ვაკის პარკში, ვეტერანები, მოქალაქეები, ასევე უცხოელი სტუმრები შეიკრიბნენ და ფაშისტურ გერმანიაზე გამარჯვების 72 წლისთავი აღნიშნეს.

მოქალაქეებმა 9 მაისის მემორიალი ყვავილებით შეამკეს. დაცვის თანხლებით, ადგილზე მივიდა საქართველოს მართლმადიდებელი ეკლესიის კათალიკოს-პატრიარქი ილია მეორეც.

დილით, ვაკის პარკში, რუსეთის პრეზიდენტთან დაახლოებული მოტოციკლეტისტთა დაჯგუფება ღამის მგლების წევრებიც გამოჩნდნენ, თუმცა მათ ტერიტორია მალე დატოვეს.

"მინდა რომ მშვიდობა იყოს, რაც გადაიტანა ქვეყანამ, ბრძოლები. მინდა რომ თქვენ და მომავალმა თაობამ უკეთეს პირობებში იცხოვროს, მეტი არაფერი მინდა" - ამბობს 88 წლის შოთა მამუკაშვილი On.ge-სთან საუბრისას.

მეორე მსოფლიო ომის დროს, სტალინგრადში დაღუპული ქართველი ჯარისკაცის დიმიტრი დევნოზაშვილის ფოტო მის ოჯახის წევრს, ალექსანდრე დევნოზაშვილს უჭირავს. 9 მაისი, 2017 წელი, თბილისი, ვაკის პარკი.

ფოტო: On.ge

"ჩვენი ბაბუების და ბებიების ბრწყინვალე გამარჯვებას აღვნიშნავ. მე თვითონ ვეტერანი ვარ და რომ ვუყურებ ჩემი გადასახედიდან, ისინი ჩვენზე უკეთესი და ლამაზი გოგო ბიჭები იყვნენ. ჩვენზე კარგები იყვნენ. ყველაფრით. ჩვენი თაობა მათან ვალში ვართ, ჩვენ ის იმედები რაც ჩვენს მიმართ ჰქონდათ, ვერ გავამართლეთ. ახალი თაობა ძალიან კარგია. საქართველოში მუდამ იყო კრიტიკული მასის ის რაოდენობა, რომელსაც ქვეყნის წინ წაყვანა შეეძლო" - ამბობს საქართველოს ჩოხოსნების თავჯდომარე ზაალ სიხარულიძე On.ge-სთან.

საქართველოს ჩოხოსნების თავჯდომარე ზაალ სიხარულიძე.

ფოტო: On.ge

"ჩემთვის დიდი მნიშვნელობა აქვს ამ დღეს, აქ ვართ ვეტერანები. ჩვენი დაღუპულებს პატივს თუ არ ვცემთ, ხვალინდელი დღე აღარ იარსებებს. არ უნდა დაგვავიწყდეს ის ხალხი, ვინც ჩვენთვის და დედამიწისთვის იბრძოლა" - გვითხრა ვიცე-პოლკოვნიკმა ზამირა სურგულაძემ.