რუსეთის პრეზიდენტთან დაახლოებული მოტოციკლისტების დაჯგუფება ღამის მგლების ორი წევრი მივიდა დღეს ვაკის პარკში, სადაც მეორე მსოფლიო ომის მონაწილეები არიან შეკრებილნი და აღნიშნავენ ფაშიზმზე გამარჯვების დღეს.

როგორც ღამის მგლების ერთმა წევრმა ჟურნალისტებს უთხრა, ისინი ადგილზე იმყოფებიან, რათა "პატივი მიაგონ" მეორე მსოფლიო ომში დაღუპულთა ხსოვნას:

"მე არ ვარ პოლიტიკოსი, მე, უბრალოდ, პატივს მივაგებ ჩვენს გმირებს, რომლებიც ნაციზმს ებრძოდნენ. მე ამაყი ვარ, რომ მათ ეს გააკეთეს, ისინი იყვნენ რკინის ადამიანები, რომლებმაც მთელი მსოფლიო გადაარჩინეს."

ღამის მგლების ლიდერი, რუსეთის პრეზიდენტ პუტინის მეგობარი, ალექსანდრე ზალდოსტანოვი, მეტსახელად „ქირურგი“, რუსულ-ქართული ახალგაზრდული კავშირის ორგანიზებით 9 მაისს თბილისში, დაჯგუფების სხვა წევრებთან ერთად ორგანიზებულად აპირებდა ჩამოსვლას.

საქართველოს შინაგან საქმეთა სამინისტრომ თქვა, რომ რუსი მოტოციკლისტების სტუმრობა არასასურველად მიაჩნია, თუმცა, ღამის მგლების მიერ სახელმწიფო საზღვრის გადმოკვეთის შემთხვევაში, პოლიცია მათ გადაადგილებას და ქცევას ყურადღებით დააკვირდება. საბოლოოდ, ისინი საქართველოში ამჯერად ორგანიზებულად არ შემოსულან, თუმცა, რამდენიმე მათგანმა მაინც მოახერხა საზღვრის გადმოკვეთა, შსს-მ განმარტა, რომ ისინი ტურისტთა ჯგუფს, ღონისძიების დაანონსებამდე ბევრად ადრე, მაიდენტიფიცირებელი ნიშნების გარეშე შემოჰყვნენ.

ღამის მგლების საქართველოში შემოსვლის წინააღმდეგ ონლაინ პეტიციაც შეიქმნა, რასაც რამდენიმე ათასმა ადამიანმა მოაწერა ხელი.

ღამის მგლები ყოველწლიურად აწყობენ მოტოგარბენს იმ ქვეყნებში, რომლებიც ოდესღაც საბჭოთა კავშირის წევრები იყვნენ, მათ რამდენიმე ქვეყანაში, მათ შორის პოლონეთში, უკვე წლებია არ აძლევენ შესვლის უფლებას. აღნიშნული დაჯგუფების წევრები, მიუხედავად იმისა, რომ მათ ოკუპირებულ აფხაზეთსა და ცხინვალში ყოფნით არაერთხელ აქვთ დარღვეული საქართველოს კანონი ოკუპაციის შესახებ, გასულ წლებში იმყოფებოდნენ საქართველოში. 2013 წელს, მათი ლიდერი, ალექსანდრე ზალდოსტანოვი ილია მეორემაც კი მიიღო საპატრიარქოში.