საპარლამენტო უმრავლესობის წარმომადგენელმა ზაქარია ქუცნაშვილმა საქართველოში მოსკოვის ყოფილი მერის ვიზიტზე, On.ge-სთან საუბრისას თქვა, რომ იგი მას როგორც ტურისტს მიესალმება, თუმცა როგორც ყოფილი მაღალჩინოსანი, საქართველოს მიმართ ლოიალურად განწყობილი არ ყოფილა:

"როგორც ტურისტს მივესალმები, ვინაიდან ჩვენ ბევრი ტურისტი გვჭირდება, ხოლო როგორც რუსეთის ყოფილ მაღალი თანამდებობის პირს და მის ქმედებებს, პოსტზე ყოფნის პერიოდში, ის არ იყო ლოიალურად განწყობილი და მისი განცხადებები ჩვენ კარგად გვახსოვს, მათ შორის ცხინვალისა და აფხაზეთის რეგიონებთან მიმართებით".

ზაქარია ქუცნაშვილმა ლუჟკოვის საზღვარზე შემოშვებასთან და ოკუპირებული ტერიტორიების შესახებ კანონის დარღვევასთან დაკავშირებულ შეკითხვას არ უპასუხა და თქვა, რომ ლუჟკოვი უკვე ოთხი დღეა ქვეყანაშია და დაგვიანებულია ამაზე საუბარი, შემოშვების პასუხისმგებლობა კი კონკრეტულ უწყებებს აკისრიათ.

მოსკოვის ყოფილი მერი იური ლუჟკოვი საქართველოში იმყოფება. იგი ქვეყანაში ოთხი დღის წინ სომხეთიდან ჩამოვიდა. მან საზოგადოებრივ მაუწყებელთან ინტერვიუს დროს საქართველოს ტერიტორიული მთლიანობის საწინააღმდეგო განცხადება გააკეთა:

"აფხაზეთი სხვა ქვეყანაა, ეს სულ სხვა ხალხია. ასეა ოსეთიც. ბუნებრივია, არსებობს გარკვეული ნოსტალგია და ბრაზი, მაგრამ ვფიქრობ, საქართველო, ამ რეგიონების ჩამოშორების შემდეგ, მომავალში უკეთ იგრძნობს თავს".

ლუჟკოვს დარღვეული აქვს საქართველოს კანონი ოკუპაციის შესახებ და ის საქართველოს ოკუპირებულ რეგიონებში რუსეთის მხრიდანაა ნამყოფი.

ამაზე საუბრისას, ლუჟკოვი აცხადებს, რომ კანონის შესახებ სმენია, თუმცა საზღვარი უპრობლემოდ გადმოკვეთა, მისი დოკუმენტაცია კი "წესების შესაბამისად" შემოწმდა.