"მათი ამბავი ჯერ არ დამთავრებულა", - Netflix-ის დრამა თინეიჯერებზე, 13 Reasons Why, მეორე სეზონით ეკრანებზე 2018 წელს დაბრუნდება.

The Hollywood Reporter-ის ინფორმაციით, მეორე სეზონში ნაჩვენები იქნება სერიალის გმირების რთული გზა და მოთხრობილი იქნება მოვლენები, რომლებიც ჰანას სიკვდილის შემდეგ განვითარდა.

სერიალის შემქმნელებისგან ჯერ არ დადასტურებულა, იქნება თუ არა ჰანა ბეიკერის როლის შემსრულებელი ახალ სერიალში, თუმცა რამდენიმე მინიშნება უკვე არსებობს.

"ჰანას ისტორია ჯერ არ დასრულებულა. ის ამბის მთავარი გმირია და მის გაგრძელებაში მას ჯერ კიდევ გადამწყვეტი როლი აქვს", - ამბობს სერიალის შემქმნელი ბრაიან იორკი.

იორკის თქმით, მისთვის არადამაკმაყოფილებელი იქნებოდა, სერიალის პირველი 13 ეპიზოდით დასრულება:

"ამბავში ფიგურირებს სექსუალური მოძალადე, რომელიც დაუსჯელია, და გაუპატიურების ცოცხალი მსხვერპლი, რომელიც სწორედ ახლა იწყებს განკურნების გზას. ჰანას მშობლებს კი ჯერ კიდევ არ აქვთ სრული ინფორმაცია, თუ რა მოხდა მათი შვილის თავს".

ახალი სეზონი, წინას მსგავსად, 13 საათიანი იქნება.

13 მიზეზი რატომ, რომელიც ეკრანებზე 31 მარტს გამოვიდა, უკვე გახდა წლის ყველაზე ბევრჯერ დატვიტული სერიალი. ამასთან ერთად, სერიალი მკაცრადაც გააკრიტიკეს. სკოლების ადმინისტრაციები ამბობდნენ, რომ სერიალი თინეიჯერის თვითმკვლელობას აქტს ადიდებდა, სუიციდის თავიდან აცილების ექსპერტები კი ამბობდნენ, რომ ის საშიში იყო.

ფოტო: Netflix

13 Reasons Why ჯეი აშერის წიგნია, რომელიც 2007 წელს გამოვიდა და 2011 წელს, New York Times-ის ბესტსელერების სიაში პირველი ადგილი დაიკავა.

ავტორის თქმით, წიგნის პირველ ვერსიაში ჰანა ცოცხალი რჩებოდა. მას მშობლები დროულად პოულობდნენ და თინეიჯერი ცხოვრებისგან ახალ შანსს იღებდა, თუმცა, მოგვიანებით, მან გადაწყვიტა, რომ დასასრული შეეცვალა:

"თემის სერიოზულობიდან გამომდინარე, ამას ვერ გავაკეთებდით. ჩვენ წიგნიდან რამე უნდა გვესწავლა, ამ დასასრულით, ამბის მესიჯი ისეთი ძლიერი ვერ იქნებოდა, ჰანა რომ ცოცხალი დარჩენილიყო".