ქართული ოცნების თავმჯდომარის, ირაკლი კობახიძის განცხადებით, უკრაინის ხელისუფლება საქართველოს მიმართ დიპლომატიური დემარშის მდგომარეობაშია. მისი თქმით, ასეთ დროს პრემიერმინისტრის, ირაკლი ღარიბაშვილის ვიზიტი დაბრკოლებებთანაა დაკავშირებული.

იმედის ეთერში ჟურნალისტს კითხვაზე, რატომ არ ჩადის პრემიერმინისტრი უკრაინაში, კობახიძემ ასე უპასუხა:

"რატომ არ ჩადის მაგალითად უამრავი ევროკავშირის წევრი ქვეყნის პრემიერი? ყველაფერს აქვს თავისი მიზეზი. ჩვენს შემთხვევაში არის ერთი კონკრეტული მნიშვნელოვანი ფაქტორი, მათ შორის, რაც ხელს უშლის ბუნებრივია პრემიერის შესაძლო ვიზიტს, ეს არის ის ფაქტი, რომ ელჩი თანამდებობიდან იქნა ჯერ გაწვეული ე.წ. კონსულტაციებზე, შემდეგ საერთოდ გათავისუფლებული, თუმცა აქტი, როგორც ვიცი, არც არის გამოცემული ამასთან დაკავშირებით.

პრაქტიკულად უკრაინის ხელისუფლება დღემდე არის საქართველოს მიმართ დიპლომატიური დემარშის მდგომარეობაში, ასეთ დროს პრემიერის ვიზიტი უკრაინაში არის, რა თქმა უნდა, გარკვეულ დაბრკოლებებთან დაკავშირებული", — ამბობს ის.

ღარიბაშვილმა ჯერ კიდევ, ომის დაწყების მეორე დღეს, 25 თებერვალს ისაუბრა უკრაინაში არჩასვლის მიზეზზე. მაშინ ეს ჩაკეტილი საჰაერო სივრცით "ახსნა".