იმის მიუხედავად, რომ 2022 წელი დგას, მსოფლიოს არაერთ ქვეყანაში ხელოვანებს კვლავ ზღუდავენ, მათ შემოქმედებას კი არცთუ იშვიათად ცენზურა ემუქრება ხოლმე. სწორედ ამ პრაქტიკის წინააღმდეგ აიმაღლა ხმა ამერიკულმა გამომცემლობამ Penguin Random House-მა და გადაწყვიტა, ერთ-ერთი ყველაზე განხილვადი ნაწარმოები, მარგარეტ ეტვუდის მხევლის წიგნი, ცეცხლგამძლე ეგზემპლარად გამოეცა. ეგზემპლარი აუქციონზე გაიყიდება, შემოსული თანხა კი მწერალთა ასოციაცია PEN-ს გადაეცემა.

უჩვეულო გამოცემის დასაანონსებლად გამომცემლობამ ორიგინალური ვიდეოც გადაიღო — კადრში 82 წლის მარგარეტ ეტვუდი ჩნდება და თავისი ყველაზე ცნობილი რომანისთვის ცეცხლის წაკიდებას ცდილობს, თუმცა, ამაოდ.

გამომცემლობის თქმით, მხევლის წიგნის ცეცხლგამძლე გამოცემა ცენზურის წინააღმდეგ ბრძოლის სიმბოლოა. ვიდეოში აღნიშნულია ის ფაქტიც, რომ მხოლოდ გასულ წელს მსოფლიოში არაერთი წიგნი აიკრძალა, ზოგიერთს კი ცენზურის უკიდურესი ფორმა — დაწვაც — შეეხო.

გამოცემის ერთ-ერთი შემქმნელი სააგენტოს წარმომადგენელს, რობი პერსის და კრეატიულ დირექტორ ქეროლინ ფრიზენს იდეა სწორედ მაშინ დაებადათ, როცა შარშან ტეხასის კანონმდებელმა იმ ასობით წიგნის სია შეადგინა, რომელიც სასკოლო ბიბლიოთეკებიდან უნდა ამოღებულიყო.

პერსიმ და ფრიზენმა იფიქრეს, რა იქნებოდა ცენზურის უკიდურესი ფორმისგან წიგნის დაცვის საშუალება და ასე გადაწყვიტეს, რომ შეექმნათ ცეცხლგამძლე ეგზემპლარი, როგორც დაუმორჩილებლობის სიმბოლო. თუ რომელი წიგნი იქნებოდა ეს, ბევრი არ უფიქრიათ — 1980-იან წლებში გამოსული მხევლის წიგნი ხომ არაერთხელ აუკრძალავთ.

საბოლოოდ, 384-გვერდიანი ტექსტი ჩვეულებრივი ფურცლის მაგივრად, სპეციალურად დამუშავებული ალუმინის შემცველი პროდუქტით დამზადდა და ხელით აიკინძა, რასაც ორ თვეზე მეტი დასჭირდა.

მხევლის წიგნი კი პოპულარობას არ კარგავს. წიგნის გამოცემიდან თითქმის ოთხი ათწლეულის შემდეგაც კი, ნაწარმოები და თემები, რომლებსაც ეტვუდი შეეხო, კვლავ აქტუალურია. მეტიც — რომანის მიხედვით გადაღებული სერიალის პროდიუსერი და მსახიობი ელიზაბეთ მოსი ნატრობს კიდეც, რომ გილეადის ამბები ჩვენს რეალობაში ასეთი აქტუალური აღარ იყოს. საქმე ეხება აშშ-ის უზენაესი სასამართლოს შესაძლო გადაწყვეტილებას, ქვეყანაში ადამიანებს აბორტის უფლება შეეზღუდოთ. მხევლის წიგნში განხილული ერთ-ერთი მთავარი საკითხი კი სწორედ ქალების რეპროდუქციული უფლებების ხელყოფაა.

სხვათა შორის, ამ შესაძლო გადაწყვეტილების წინააღმდეგ საპროტესტო გამოსვლებზე ბევრი ადამიანი სწორედ გილეადის მხევლის სამოსით გამოვიდა.