2 წლის ტეხასელი ბიჭის მშობელი გაოცებული დარჩა, როცა McDonald’s-ის შეკვეთა კართან მიუტანეს და ამის შესახებ არაფერი იცოდა. როგორც აღმოჩნდა, ქალის ტელეფონზე 2 წლის შვილი თამაშობდა, რომელმაც McDonald’s-დან საკვების მიტანის აპლიკაციით 31 ჩიზბურგერი შეუკვეთა.

ეს ყველაფერი მაშინ გაირკვა, როცა ქალი კურიერის პირისპირ აღმოჩნდა და საკმაოდ დიდი ზომის შეკვეთაც მიიღო. "სახლში 31 უფასო ჩიზბურგერი მაქვს იმ ადამიანებისთვის, ვინც ამით დაინტერესდება", — დაწერა ქალმა თავის ინსტაგრამზე და პოსტს შვილის ფოტოც დაურთო.

დედის თქმით, ის კომპიუტერთან მუშაობდა და არ იცოდა, რომ შვილმა მისი ტელეფონი აიღო. "მას ძალიან უყვარს ფოტოების გადაღება და ჩვეულებრივ, ტელეფონს ამისთვის იყენებდა. მეგონა, რომ ტელეფონი განბლოკილი არ იყო, მაგრამ ასე არ აღმოჩნდა, რადგან კურიერმა საკმაოდ დიდი შეკვეთა მომიტანა", — ამბობს 2 წლის ბიჭის დედა.

შეკვეთის საფასური 62 დოლარი იყო, რასაც გზის ფულიც დაემატა და საბოლოო ჯამში, ქალს 91,70 დოლარის გადახდა მოუწია. დედა ამ ამბით არ გაბრაზებულა და უფასო ბურგერები ყველა მსურველს შესთავაზა.

"არ ვიცოდი, რა გამეკეთებინა, რადგან ჩემმა შვილმა მხოლოდ შეკვეთის ნახევარი შეჭამა. ამიტომ პოსტი გამოვაქვეყნე და ჩიზბურგერები მათ მოყვარულ ადამიანებს შევთავაზე", — ამბობს დედა. ქალის თქმით, მობილურ ტელეფონში საკვების მიტანის სერვისის აპლიკაციის დამალვას აპირებს, რათა სამომავლოდ ასეთი შეკვეთები აღარ მიიღოს.