საქართველოს პრეზიდენტი, გიორგი მარგველაშვილი ამბობს, რომ კონსტიტუციის პროექტით კანონდება ხმების მითვისება, რაც გადაუნაწილებელი მანდატების გამარჯვებული პარტიისთვის მიკუთვნებით გამოიხატება. ამის შესახებ მან კონსტიტუციის პროექტზე საუბრისას სოხუმის სახელმწიფო უნივერსიტეტის სტუდენტებსა და პროფესორ-მასწავლებლებთან შეხვედრისას განაცხადა.

მარგველაშვილმა შეხვედრაზე კონსტიტუციის პროექტში არსებულ გადაუნაწილებელ მანდატების განაწილებაზე, პარლამენტის როლზე, საარჩევნო ბარიერზე, პრეზიდენტსა და მთავარსარდლის უფლებების შემცირებაზე ისაუბრა. გარდა ამისა, პრეზიდენტს ჰგონია, რომ ხუთპროცენტიანი საარჩევნო ბარიერი და საარჩევნო ბლოკების შექმნის აკრძალვა, სუსტი პოლიტიკური პარტიების არსებობის პირობებში, ქართული პოლიტიკური ტრადიციის წინააღმდეგ წასვლაა.

"ძლიერი პარლამენტი იქნებოდა მაშინ, როდესაც მას ექნებოდა მთავრობაზე კონტროლის მაღალი ხარისხი; ორპალატიანი პარლამენტის შემთხვევაში მაჟორიტარების პრობლემაც მოგვარდებოდა,” - განაცხადა გიორგი მარგველაშვილმა.

საკონსტიტუციო პროექტის მიხედვით, საქართველოს პარლამენტში მაჟორიტარული სისტემა უქმდება; პარტიებს ბლოკების შექმნა აღარ შეეძლებათ; პარტიების, რომლებიც ბარიერს ვერ გადალახავენ არჩევნებზე მათ მიერ ჯამურად დაგროვებული პროცენტული მაჩვენებლის შესაბამის მანდატებს კი, გამარჯვებული პარტია მიიღებს. გარდა ამისა, პრეზიდენტი პირდაპირი წესით აღარ აირჩევა და მას ხმას ე.წ. ხმოსნები მისცემენ, რომლებიც პარლამენტიისა და თვითმმართველობების წევრებით დაკომპლექტდებიან.