საზოგადოებრივი მაუწყებლის აჭარის ტელევიზიისა და რადიოს ინფორმაციით, ხულოში დაახლოებით 750-მდე ოჯახს სასმელად დაბინძურებული წყალი მიეწოდება. მოსახლეობისთვის წყლის მიწოდების ვალდებულება შპს ხულოს წყალკანალს აქვს.

"წყლის გამწმენდ ნაგებობაში ამღვრეულ, ტალახისფერ წყალთან ერთად, აჭარის საზოგადოებრივმა მაუწყებელმა სხვადასხვა ნარჩენებიც დააფიქსირა," - ვკითხულობთ მაუწყებლის ვებგვერდზე.

ფოტო: საზოგადოებრივი მაუწყებლის აჭარის ტელევიზია და რადიო

On.ge-მ სცადა ხულოს წყალკანალთან დაკავშირება და აღნიშნული ინფორმაციის გადამოწმება, თუმცა, კომპანიაში ამ დრომდე ზარებს არ პასუხობენ.

ხულოს წყალკანალის წარმომადგენელი საზოგადოებრივი მაუწყებლის აჭარის ტელევიზიასთან და რადიოსთან აცხადებს, რომ დაბინძურებული წყალი, სათავე ნაგებობიდან მიედინება და დასძენს, რომ კომპანია წყლის დაქლორვას 24 საათის განმავლობაში აწარმოებს, წყალის დასალევად გამოყენება კი, შეიძლება.