ევროკომისიის პრეზიდენტი ურსულა ფონ დერ ლაიენი აცხადებს, რომ თუკი ევროკავშირი ერთსულოვანი კენჭისყრის წესის გაუქმებას გადაწყვეტს, იგი ამ გადაწყვეტილებას მხარს დაუჭერს. ევროპის მომავლის შესახებ კონფერენციაზე ევროპარლამენტის წინაშე სიტყვით გამოსვლისას ლაიენმა თქვა, რომ ის მხარს უჭერს ევროკავშირის ხელშეკრულებების რეფორმას "თუ ეს საჭირო იქნება".

"ახლა ჩვენი ჯერია, ყველაზე პირდაპირი გზით მივიდეთ გამიზნულ შედეგამდე. ამისთვის ხელშეკრულებით გათვალისწინებული ყველა რესურსი უნდა გამოვიყენოთ და დიახ, შესაძლებელია ხელშეკრულების შეცვლაც, თუ ამის საჭიროება იარსებებს", — თქვა ლაიენმა.

ევროკომისიის პრეზიდენტის თქმით, ყოველთვის ამტკიცებდა, რომ ერთსულოვან კენჭისყრას ზოგიერთ ძირითად მიმართულებაში აზრი აღარ აქვს, თუ ევროკავშირს სურს უფრო სწრაფად მოქმედება.

საფრანგეთის პრეზიდენტმა, ემანუელ მაკრონმა ევროკავშირის წევრ ქვეყნებს შესთავაზა, რომ ხელშეკრულების რეფორმირების საკითხი ივნისის საბჭოს სამიტზე განიხილონ.

ევროკავშირის ცამეტმა წევრმა ქვეყანამ განაცხადა, რომ ხელშეკრულების ცვლილების შესახებ საუბარი "გაუაზრებელი და ნაადრევია". ეს ქვეყნებია: ბულგარეთი, ხორვატია, ჩეხეთი, დანია, ესტონეთი, ფინეთი, ლატვია, ლიეტუვა, მალტა, პოლონეთი, რუმინეთი, სლოვენია და შვედეთი.

13 ქვეყნის განცხადებაში ნათქვამია, რომ ევროკავშირის მიერ ბოლო წლების კრიზისების მართვა, მათ შორის COVID-19 და რუსეთის მიმდინარე აგრესია უკრაინის წინააღმდეგ, ნათლად აჩვენებს, რამდენად შეუძლია ევროკავშირს მიაღწიოს შედეგებს მიმდინარე ხელშეკრულების ფარგლებში.

ერთსულოვანი კენჭისყრის გაუქმების შემთხვევაში ევროკავშირი გადაწყვეტილებებს ხმათა უმრავლესობით მიიღებს. ამ ეტაპზე იმისთვის, რომ ევროკავშირმა განხილული საკითხი მიიღოს, საჭიროა, ყველა წევრი ქვეყანა უჭერდეს მას მხარს. დღეს, როცა საქართველომ, უკრაინამ და მოლდოვამ ევროკავშირის წევრობის კითხვარი შეავსეს და ევროკავშირმა კენჭი უნდა უყაროს ამ საკითხს, ეს ცვლილება კიდევ უფრო დიდ მნიშვნელობას იძენს.