უკრაინის განცხადებით, რუსეთი ცრუობს, როცა აღლუმზე ავიაციის არგამოჩენას ამინდს აბრალებს. ეროვნული უსაფრთხოებისა და თავდაცვის საბჭოს ცნობით, რუსეთმა აღლუმზე საჰაერო ნაწილი იმიტომ გააუქმა, რომ შესაძლოა, უკრაინულ გადასატან საზენიტო სარაკეტო კომპლექსებს "შეხვედროდნენ".

"2020 წელს რუსულმა მედიამ დაწერა, რომ რუსეთის ფედერაციამ 540 მილიონ რუბლზე მეტი დახარჯა, რათა სამხედრო ავიაციის უსაფრთხოებისთვის "ღრუბლები გაეფანტა". გასულ წელს ამ თანხამ 417 მილიონი რუბლი შეადგინა [...] შესაბამისად, "ცუდ ამინდზე" ამბავი მხოლოდ მანიპულაციაა, რადგან პუტინის საკრალურ თარიღზე 500 მილიონი რუბლის დახარჯვა რუსეთისთვის პრობლემა არ არის", — აღნიშნავენ უწყებაში.

კრემლის ოფიციალური ვერსიით, 9 მაისის აღლუმზე საჰაერო ნაწილი ამინდის პირობების გამო გაუქმდა. არადა, სოციალურ ქსელებში რამდენიმე დღის წინ გავრცელდა კადრები, სადაც ჩანდა, რომ რუსული ავიაცია Z სიმბოლოს გამოხატვას ცდილობდა.

დღეს წითელ მოედანზე რუსული არმია საზეიმო აღლუმით გამოვიდა. შეკრებილებს სიტყვით მიმართა რუსეთის პრეზიდენტმა, ვლადიმერ პუტინმა, რომელმაც კიდევ ერთხელ გააჟღერა საკუთარი პროპაგანდისტული გზავნილები, თუმცა თქვა იმაზე ნაკლები, ვიდრე მსოფლიო ელოდა.

მან გაატარა ნარატივი, თითქოს უკრაინაში შეჭრა დასავლეთმა, ნატოს გაფართოებამ და უკრაინის აგრესიულმა რიტორიკამ აიძულა. ის ამტკიცებდა, რომ უკრაინა ბირთვულად შეიარაღებას, ყირიმში შეჭრას და დონბასში სადამსჯელო ღონისძიებებს გეგმავდა.

გაიგეთ მეტი: