უკრაინის ვიცეპრემიერის, ირინა ვერეშჩუკის განცხადებით, 4 მაისს მარიუპოლიდან ჰუმანიტარული დერეფნებით 344 ადამიანი გამოიყვანეს. ევაკუირებულ მოსახლეობას შორის არიან ქალები ბავშვები და მოხუცები.

უკრაინის პრეზიდენტის ვოლოდიმირ ზელენსკის მადლობას უხდის ყველას, ვინც წარმატებით ახორციელებს ევაკუაციის პროცესს.

"მარიუპოლიდან ჩვენი ევაკუაციის ოპერაციის მეორე ეტაპი დღეს დასრულდა. 344 ადამიანი გადაარჩინეს — ქალაქიდან და მისი შემოგარენიდან. ჩვენი გუნდი ემზადება მათ შესახვედრად. შეხვდით ისევე, როგორც 150-ზე მეტ ადამიანს, რომლების გამოყვანაც აზოვსტალიდან მოვახერხეთ. ისინი ყველა იღებენ საჭირო დახმარებას. ყველა მათგანი მიიღებს ყველაზე მზრუნველ მოპყრობას ჩვენი სახელმწიფოსგან", — აცხადებს ზელენსკი.

3 მაისს აზოვსტალიდან ზაპოროჟიეში 156 ადამიანის ევაკუაცია განხორციელდა. თუმცა ქარხანაში კვლავ რჩებიან მშვიდობიანი მოსახლეობა და სამხედროები.

გუშინ, 4 მაისს უკრაინსკა პრავდამ წყაროებზე დაყრდნობით გაავრცელა ინფრომაცია, რომ რუსი სამხედროები აზოვსტალის ქარხანაში შეიჭრნენ. მედია წერდა, რომ უკრაინელ მებრძოლებთან კავშირი ვერ მყარდება.

აზოვის პოლკის მეთაურის, დენის პროკოპენკოს განცხადებით, აზოვსტალში მდგომარეობა უკიდურესად მძიმეა, თუმცა ჯარისკაცები ბრძანების შესრულებას აგრძელებენ და დაცვას ინარჩუნებენ. მეთაური მადლობას უხდის მთელ მსოფლიოს მარიუპოლის მხარდაჭერისთვის.