მას შემდეგ, რაც ისრაელის საგარეო საქმეთა სამინისტრომ ადოლფ ჰიტლერსა და ვოლოდიმირ ზელენსკის შესახებ გაკეთებულ კომენტარზე სერგეი ლავროვისგან ბოდიში მოითხოვა, რუსეთის საგარეო საქმეთა სამინისტრომ განცხადება გაავრცელა და ამას "ანტიისტორიული" უწოდა.

ლავროვის უწყების მტკიცებით, ლაპიდის განცხადება "მეტწილად ხსნის ქვეყნის ხელისუფლების კურსს კიევის ნეონაცისტური რეჟიმის მხარდასაჭრად".

2 მაისს რუსეთის საგარეო საქმეთა მინისტრმა, სერგეი ლავროვმა განაცხადა, რომ ნაცისტ დიქტატორ ადოლფ ჰიტლერს "ებრაული სისხლი ჰქონდა", შესაბამისად ზელენსკის "ნაცისზმს" მისი ებრაული სისხლი არ ცვლის.

ამ განცხადების შემდეგ ისრაელის საგარეო საქმეთა სამინისტრომ რუსეთის ელჩი დაიბარა, ხოლო მინისტრმა განაცხადა, რომ ლავროვის განცხადება საშინელი ისტორიული შეცდომაა და მისგან ბოდიშს ელიან.

სახელმწიფო დეპარტამენტის პრესპიკერმა, ნედ პრაისმა ისრაელის საგარეოს პოზიცია გაიზიარა და ლავროვის განცხადებებს რასიზმის, პროპაგანდისა და მზაკვრული ტყუილების ყველაზე დაბალი გამოვლინება უწოდა.