პარკირების წესის დარღვევისთვის ჯარიმა 10 ლარიდან 50 ლარამდე გაიზრდება. ამის შესახებ თბილისის მერმა თბილისის მუნიციპალური მერიის მთავრობის სხდომაზე განაცხადა. მისივე თქმით, "გადაადგილების გაუმჯობესების მიზნით" საკანონმდებლო პაკეტია შემუშავებული, რომელიც პარლამენტს უკვე წარუდგინეს.

"ძალიან ბევრი გულისტკივილის წერილი შემოდის იმასთან დაკავშირებით, რომ ტროტუარებზე არის ავტომობილები გაჩერებული და ფეხით გადაადგილებაც კი შეუძლებელია. რა თქმა უნდა, გვინდა ეს ყველაფერი მოწესრიგდეს, დარეგულირდეს. ჩვენი სატრანსპორტო პოლიტიკა შეიცავს და მოიცავს ამ ყველაფერს. შესაბამისად, გარკვეული ცვლილებები განხორციელდება კანონში ჯარიმების გაზრდის თვალსაზრისით. რა თქმა უნდა, ჯარიმები არავის უხარია, მაგრამ, როგორც ჩანს, ეს არის აუცილებელი იმისთვის, რომ ქალაქში იყოს წესრიგი და ეს მიმართულება იყოს მოწესრიგებული.", — განაცხადა მან.

ამასთან, კალაძის ინფორმაციით, ჯარიმა გაიზრდება მათთვისაც, ვინც ავტომობილს ველოსიპედის ზოლზე გააჩერებს ან იქ გადაადგილდება. მისი თქმით, ჯარიმა 50 ლარიდან 100 ლარი გახდება. ასევე, თბილისში შშმ პირების გაჩერების ადგილზე პარკირებისთვის ჯარიმა 50 ლარია, ცვლილებების შემდეგ კი ის გაორმაგდება.