პარლამენტის თავმჯდომარე, შალვა პაპუაშვილი აცხადებს, რომ, სავარაუდოდ, ივანიშვილისა და რუსი ოლიგარქის საუბრის ჩანაწერი მონტაჟია. მისი თქმით, დეზინფორმაციული კამპანია მიმდინარეობს იმისთვის, რომ "ქვეყანა ჩათრეული იყოს ომში".

"ჩვენ გუშინ ვიზუალურადაც კი ვიხილეთ, როგორ მზადდება და როგორ ხდება განხორციელება დეზინფორმაციული კამპანიის. ე.წ ჩანაწერების ჩვენებით, რომელიც მგონი, შეუიარაღებელი თვალითაც და ყურითაც ჩანს, რომ არის მონტაჟი, როგორ ხდება ამაზე რეაქცია შიგნით და გარეთ, ვინ არიან ამაში ჩართული. როგორ ხდება ამ თემის აქტუალიზირება პარტიის და შემდეგ ნაციონალური მოძრაობის ტელევიზიების მიერ, როგორ ხდება შემდეგ ნაციონალური მოძრაობის ახალგაზრდული ფრთის სირცხვილიას მიერ ამის ქვეყნის გარეთ გატანა და ა.შ." — აცხადებს ის.

ჟურნალისტების შეკითხვას, უნდა დაიწყოს თუ არა გამოძიება სახელმწიფო უსაფრთხოების სამსახურმა, პაპუაშვილი პასუხობს, რომ არაფერი ადასტურებს ჩანაწერების ავთენტურობას და არანაირი ფაქტი არ არსებობს.

ამასთანავე, პარლამენტის თავმჯდომარე ამბობს, რომ ბიძინა ივანიშვილის წინააღმდეგ სანქციებს არ ელოდებიან.

გუშინ, 25 აპრილს ინტერნეტში, სავარაუდოდ, ვლადიმირ ევტუშენკოვისა და ბიძინა ივანიშვილის საუბარი გავრცელდა. ევტუშენკოვი მილიარდერი ოლიგაქრია, რომელსაც პუტინთან აფილირებულ პირად მიიჩნევენ, მას დასავლეთმა რუსეთის უკრაინაში შეჭრის შემდეგ, სანქციები დაუწესა. ჩანაწერში საუბარია ბიზნესგეგმებზე, რამაც გააჩინა მოსაზრება, რომ ოლიგარქები სანქციებისთვის გვერდის ავლას ცდილობენ.

გავრცელებული ჩანაწერების შემდეგ, უკრაინის უმაღლესი რადას ფრაქცია ხალხის მსახურის თავმჯდომარემ, დავით არახამიამა ევროკავშირსა და აშშ-ს მოუწოდა, ივანიშვილის მიმართ სანქციების დაწესება განიხილონ. მისი თქმით, "ქართველი ოლიგარქი ბიძინა ივანიშვილი მჭიდრო კავშირშია რუსეთის პოლიტიკურ ელიტასთან".

გაიგე მეტი: