მსოფლიო ბანკის განცხადებით, უკრაინაში ომის შედეგად შენობებსა და ინფრასტრუქტურაზე მიყენებული ზიანი 60 მილიარდ დოლარს შეადგენს. ბანკის პრეზიდენტის, დეივიდ მალპას თქმით, ეს რიცხვები კიდევ უფრო გაიზრდება. როგორც Reuters წერს, მან კონფერენციაზე უკრაინის ფინანსური დახმარების საჭიროებებზეც ისაუბრა.

"რა თქმა უნდა, ომი ჯერ კიდევ გრძელდება, ამიტომ ეს ხარჯებიც გაიზრდება", — აღნიშნა მალპასმა.

მსოფლიო ბანკის კონფერენციაზე ვიდეოჩართვა ჰქონდა უკრაინის პრეზიდენტს, ვოლოდიმირ ზელენსკის. მისი თქმით, უკრაინას თვეში 7 მილიარდი დოლარი ესაჭიროება, რათა ანაზღაურდეს ქვეყანაში რუსეთის შეჭრით გამოწვეული ეკონომიკური ზარალი.

"მოგვიანებით, ყველაფრის აღსადგენად ასობით მილიარდი დოლარი დაგვჭირდება", — უთხრა კონფერენციის მონაწილეებს ზელენსკიმ.

მან თქვა, რომ გლობალურმა საზოგადოებამ დაუყოვნებლივ უნდა გამორიცხოს რუსეთი საერთაშორისო ფინანსური ინსტიტუტებიდან, მათ შორის მსოფლიო ბანკისა და საერთაშორისო სავალუტო ფონდიდან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში