ბიზნესისა და ტექნოლოგიების უნივერსიტეტისა და სტარტაპ EKIMO-ის ორგანიზებით, 19-20 აპრილს, სტუდენტებისთვის HealthTech ჰაკათონი ჩატარდა. ჰაკათონი, მობილური აპლიკაციის გამოყენებით, ქრონიკული დაავადებების მქონე პირებისთვის პერსონალური ასისტენტის შექმნას ისახავდა მიზნად. მასში მონაწილეობას ბიზნესისა და ტექნოლოგიების უნივერსიტეტისა და სხვადასხვა უნივერსიტეტის სამედიცინო მიმართულების სტუდენტები იღებდნენ.

ჰაკათონის მიმდინარეობისას გუნდებს სპეციალურად მოწვეული მენტორები, დიმიტრი ჯანელიძე და სოსო კუპრაშვილი, ინდივიდუალურ კონსულტაციას უწევდნე. კომპეტენტურმა ჟიურიმ კი გამარჯვებული გუნდები გამოავლინა:

I ადგილი — აპლიკაცია, რომელიც ავტომატურ რეჟიმში ითვლის წნევას, BMI-ის, ახორციელებს მის მონიტორინგს და მომხმარებელს აძლევს განახლებულ რეკომენდაციას ცხოვრების ჯანსაღ სტილთან დაკავშირებით.

• სანდრო კიკნაძე — BTU
• ალექსანდრე გალოგრე-ბარამიძე — BTU
• ქეთევან ქუფარაშვილი — დავით ტვილდიანის სამედიცინო უნივერსიტეტი

II ადგილი — ჯანსაღი კვების, აქტივობებისა და წნევის მონიტორინგის აპლიკაცია.

• შიო ანდღულაძე — BTU
• გიო მამაგულაშვილი — BTU
• ქეთი ჩახნაშვილი — დავით ტვილდიანის სამედიცინო უნივერსიტეტი

III ადგილი — აპლიკაცია, რომელიც მომხმარებელს აძლევს საშუალებას, აღრიცხოს წამლის მიღების პროცესები და გააკონტროლოს ჯანმრთელობა ციფრულად.

• მერაბ მუმლაური — BTU
• გიგა სულხანიშვილი - BTU
• ზვიად ბიბილაშვილი - გეომედი
• იონა ბართიშვილი - BTU

გამარჯვებული გუნდები მიიღებენ ფულად ჯილდოს და შესაძლებლობას, განავითარონ პროექტი სტარატაპ EKIMO-სთან ერთად:

• I ადგილი — 5000 ლარი
• II ადგილი — 3000 ლარი
• III ადგილი — 2000 ლარი

მონაწილეების იდეები მოწვეულმა ჟიურიმ შეაფასა:

• ირაკლი მირზიკაშვილი — CEO, EKIMO
• სოსო კუპრაშვილი — PO, EKIMO
• სოსო ფიფია — CEO, VABACO
• სალი კვირკველიძე — CMO, EKIMO
• ნინო მიქავა — BTU-ს ასოცირებული პროფესორი, ჯანდაცვის ასოციაციის დირექტორი

"როდესაც I ადგილზე გასული გუნდის შესახებ საუბრობდნენ, რთულად წარმოგვედგინა, რომ გამარჯვებულები ჩვენ ვიყავით, რადგან ასეთ წარმატებას არ ველოდით. ჩვენთვის ძალიან სასიხარულოა, რომ პროექტმა, რომელზეც ჰაკათონის მიმდინარეობისას აქტიურად ვმუშაობდით, ჟიურის მოწონება დაიმსახურა. ტექნიკური დავალება საკმაოდ რთული იყო და, გარდა ამისა, დროც არასაკმარისი გვქონდა, თუმცა, სწორედ ეს იყო ის გამოწვევა, რამაც უდიდესი გამოცდილება მოგვცა. ვგეგმავთ, პროექტი განვახორციელოთ სტარტაპ EKIMO-სთან ერთად და პროდუქტს დასრულებული სახე მივცეთ", — აღნიშნავენ I ადგილზე გასული გუნდის წევრები.

EKIMO ჯანმრთელობაზე ზრუნვის პლატფორმაა, რომელიც ადამიანებს საშუალებას აძლევს, მათთვის საჭირო თუ სასურველი პროდუქტი და მომსახურება ერთი სივრციდან, დისტანციურად, მიიღონ. ჰაკათონის მთავარი მიზანია, EKIMO-ს პლატფორმა გახდეს პერსონალური ასისტენტი ქრონიკული დაავადებების მქონე ადამიანებისთვის, რომელიც, თავის მხრივ, ერთგვარი პრევენციული მკურნალობის სერვისი იქნება მათთვის.