უკრაინის ქალაქ ხარკოვში მდებარე ზოოპარკის ცნობით, მათი ორი თანამშრომელი, რომელიც მარტის თვეში გაუჩინარდა, გარდაცვლილი იპოვეს. დაღუპულები რუსეთის უკრაინაში შეჭრისა და ომის დაწყების შემდეგ ზოოპარკის ცხოველებს ეხმარებოდნენ.

"დაგვიდასტურეს, რომ ჩვენი ორი თანამშრომელი, რომელიც მარტის დასაწყისში გაუჩინარდა, დაიღუპა. როცა ომი დაიწყო, მათ ქალაქში დარჩენა და ცხოველების გამოკვება გადაწყვიტეს", — წერია ზოოპარკის გავრცელებულ განცხადებაში, — "ადგილზე ჩვენ 7 მარტს მივედით, თუმცა, იქ ისინი ვერ ვიპოვეთ. დიდი ხნის განმავლობაში ვეძებდით ჩვენც და ძალოვნებიც. ბოლო მომენტამდე გვქონდა იმედი, რომ მათ რამე საშინელება არ შეემთხვათ და ისევ ცოცხლები იყვნენ. თუმცა, გუშინ მივიღეთ ინფორმაცია, რომ მათი ცხედრები იპოვეს. ჩვენს თანამშრომლებს მტრებმა ესროლეს, მათი ცხედრები კი ოთახში ჩაკეტეს".

ზოოპარკის თქმით, დაღუპული თანამშრომლები "საოცარი და მებრძოლი ადამიანები" იყვნენ.

სხვათა შორის, სწორედ ხარკოვის ზოოპარკმა განაცხადა რამდენიმე კვირის წინ, რომ ომით შექმნილი კრიზისის გამო მათ შეიძლება ცხოველები დაეძინებინათ. თუმცა, მოგვიანებით ცნობილი გახდა, რომ ზოოპარკის ბინადრებისთვის დროებითი შემფარებლები იპოვეს. როგორც ბოლოდროინდელი განცხადებიდან ირკვევა, ცხოველების ევაკუაცია ისევ გრძელდება.

"ბოლო ცხოველების გაყვანა რთული იყო, თუმცა, ეს მოვახერხეთ და ახლა ყველა მათგანი დროებით თავშესაფარში თავს კარგად გრძნობს. ნამდვილად ყველა ცხოველს გადავარჩენთ", — დასძენს ზოოპარკის ადმინისტრაცია.

თუმცა, რუსეთის უკრაინაში შეჭრისა და სრულმასშტაბიანი ომის დაწყების შედეგად, რომელიც უკვე თვენახევარზე მეტია, გრძელდება, ცხადია, მხოლოდ ცხოველები არ დაზარალებულან. ასობით დაღუპულ მშვიდობიან მოქალაქეს შორის ბავშვებიც არიან, მილიონობით უკრაინელს კი საკუთარი სახლის დატოვება მოუწია.