ექსპრეზიდენტის დედის, გიული ალასანიას განცხადებით, მიხეილ სააკაშვილის მდგომარეობა კიდევ უფრო დამძიმებულია. მისი თქმით, არაერთი მიმართვის მიუხედავად, პენიტენციურიდან რეაგირება არ არის.

"მოგიწვიეთ იმიტომ, რომ მაინტერესებს თქვენი აზრი, როგორ მოვიქცეთ, თითქოს ყველა ხერხს მივმართეთ, ყველას მივმართეთ თხოვნით, რომ რაღაცნაირად ვუშველოთ ამ ადამიანს [...] უამრავი მიმართვაა პენიტენციური დაწესებულების მიმართ, მაგრამ არავითარი რეაქცია იქიდან არ არის. პირიქით, უფრო და უფრო დაუმძიმეს მდგომარეობა ჩემს შვილს", — განაცხადა მან.

ამასთან, როგორც ალასანია ამბობს, აქვს ინფორმაცია, რომ უკრაინის პრეზიდენტმა, ვოლოდიმირ ზელენსკიმ საქართველოს პრეზიდენტს, სალომე ზურაბიშვილს სააკაშვილის უკრაინაში დაბრუნებაზე პირადად მიმართა, თუმცა ამას ქართული მხარისგან არანაირი რეაქცია არ მოჰყოლია.

დღეს, 20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.