პარლამენტში საარჩევნო კოდექსის ე.წ. გერმანული მოდელის განხილვა გრძელდება. დღეს, 31 მაისს, რესპუბლიკელების ინიცირებულ პროექტზე რამდენიმე კომიტეტში იმსჯელებენ.

საპარლამენტო უმრავლესობის წევრი, გია ვოლსკი განმარტავს, რომ საარჩევნო კოდექსის ე.წ. გერმანული მოდელი კონსტიტუციას არ შეესაბამება:

"კონსტიტუცია სხვა მოდელს გვთავაზობს, როდესაც არჩეული მაჟორიტარები არიან არჩეული მაჟორიტარები და როდესაც სიით ვინც გაიმარჯვებს, არის სიაში. ეს არის ორი განსხვავებული მიდგომა და ხედვა".

ვოლსკის განმარტებით, ე.წ. გერმანული სისტემა არ ითვალისწინებს, მაგალითად, ადამიანის უფლებას აირჩიოს და იყოს არჩეული თუ რომელიმე პარტიას არ განეკუთვნება.

რაც შეეხება უმრავლესობის წევრის, თამაზ მეჭიაურის პოზიციას, მან განმარტა, რომ ჯერ ჩამოყალიბებული არ არის:

"ერთია, სასარგებლო რა არის ქვეყნისთვის, მეორეა რა არის სასარგებლო პარტიებისთვის. თუ ავიღებთ პარტიებს, ცალსახად სასარგებლოა იმ მცირერიცხოვანი პარტიებისთვის, რომელსაც სახელმწიფო რესურსის გამოყენება არ შეუძლია მანდატების მეტი რაოდენობის მისაღებად, მაგრამ თვითონ ქვეყნის ინტერესებისთვის რამდენად სასარგებლოა, ამის თქმა მიჭირს".

საარჩევნო კოდექსის ე.წ. გერმანული მოდელი რესპუბლიკელების მიერ ინიცირებული კანონპროექტია, რომლის ავტორიც დეპუტატი ვახტანგ ხმალაძეა.