9 წლის ამერიკელმა ბიჭმა კატების დასახმარებლად ლიმონათების გაყიდვა დაიწყო და სამი წლის განმავლობაში უკვე თითქმის $2 ათასი შეაგროვა.

ბენ მილერმა თავისი საყვარელი ცხოველებისთვის ფულის შესაგროვებლად 2019 წელს მოკრძალებული კამპანია წამოიწყო და ლიმონათების გასაყიდად ქუჩაში სტენდი დადგა. ბიჭს იდეა მას შემდეგ გაუჩნდა, რაც აიდაჰოს შტატში ცხოველთა თავშესაფარს ბებიასთან ერთად ესტუმრა.

"ვნახე, რომ ზოგიერთ კატას სათამაშო არ ჰქონდა", — ამბობს პატარა მეწარმე, რომელიც ლიმონათების გასაყიდი სტენდის დადგმაზე ისედაც ფიქრობდა, თუმცა, შემდეგ გადაწყვიტა, თავისი შემოსავლით ცხოველებს დახმარებოდა.

ბენის დედის, ემი მილერის თქმით, თავისი შვილი საათების განმავლობაში დგას და გამვლელებს ორცხობილებთან ერთად სხვადასხვა არომატის ლიმონათებს სთავაზობს ხოლმე.

ფოტო: Miller Family

ბიჭის შეგროვებული თანხით თავშესაფარი კატებისთვის საკვებსა და სხვა საჭირო ნივთებს შეიძენს. დაწესებულების განცხადებით, ამჟამად კატებს გამრავლების პერიოდი აქვთ, ამიტომ მათ ბევრი რამ სჭირდებათ.

სხვათა შორის, ბენს კატების დასახმარებლად ფულის შეგროვებაში თავშესაფარიც დაეხმარა — სოციალურ ქსელებში საგანგებო ფონდის რეკვიზიტები გააზიარეს და ცხოველთა მოყვარულებს, რომლებიც პატარა ბიზნესმენის სტენდთან მოხვედრას ვერ ახერხებენ, სხვაგვარად დახმარების საშუალება მისცეს. თუმცა, ბენთან შესახვედრად ბევრმა არც გზის გავლაზე თქვა უარი.

"ზოგი თითქმის მთელი საათი მგზავრობდა, ჩვენამდე რომ მოსულიყო", — აცხადებს ბენის დედა, — "ამბობდნენ, რომ ამბავი რადიოდან შეიტყვეს".

ემის თქმით, ყოველთვის იცოდა, რომ თავის შვილს კეთილი გული ჰქონდა, თუმცა, მისმა ნამოქმედარმა მაინც გააოცა.

თავის მხრივ, თავშესაფარი დასძენს, რომ მსგავსი ინდივიდუალური ძალისხმევა დაწესებულებებს ძალიან ეხმარება, რადგან "ყოველი დოლარი მნიშვნელოვანია".

"ასეთი ბავშვების ნახვა გულს გვითბობს", — ამბობს თავშესაფრის წარმომადგენელი, — "ძალიან მადლიერები ვართ, განსაკუთრებით, ახალგაზრდების".

ბენის დედის თქმით კი, თავისი შვილი სამწლიანი საქმიანობის შემდეგაც არ აპირებს გაჩერებას.