17 წლის გოგო, რომელიც გუშინ, 28 აპრილს ცოლად მოყვანის მიზნით მოიტაცეს პოლიციის განყოფილებაშია. ამის შესახებ ინფორმაცია On.ge-ს ქალთა უფლებადამცველმა ბაია პატარაიამ და ომბუდსმენის აპარატის წარმომადგენელმა ოჯახზე დაყრდნობით მიაწოდეს. აღნიშნულს ადასტურებენ შსს-შიც.

გოგოსთან ერთად არის, სავარაუდოდ, გამტაცებელი კაციც.

ბაია პატარაია, ასევე, პოლიციის მიერ საქმისადმი გულგრილ დამოკიდებულებაზეც საუბრობს და გოგოს ეთნიკურ წარმომავლობასაც უსვამს ხაზს. მისი თქმით, პოლიცია არ ეძებს გატაცებულს, ელოდება ოჯახების მოლაპარაკებას და ხშირ შემთხვევაში საპროცესო შეთანხმებას გააფორმებენ, რაც გარკვეული თანხის გადახდას გულისხმობს:

"აზერბაიჯანელების შემთხვევაში ნამდვილად ასე [არ ეძებენ, ელოდებიან ოჯახების შეთანხმებას] იქცევიან. ამბობენ, რომ ეს არის მათი ტრადიცია. რომც იყოს ეს მათი ტრადიცია, ეს არის მავნე ტრადიცია და ამას უნდა ებრძოდეს სახელმწიფო, მაგრამ არ ებრძვიან ტრადიციებს რომლებიც ქალებს ჩაგრავენ და ქალზე ძალადობენ," - ამბობს პატარაია და ამატებს, რომ ზოგი წინასწარ აგროვებს ფულს, რომ მოტაცების შემდეგ პროკურატურას გადაუხადოს:

"ამ ადამიანებს, რეგიონში, ჰგონიათ რომ ცოლად მოყვანის მიზნით ადამიანის გატაცებაზე უბრალოდ ჯარიმაა, რადგან ყოველთვის საპროცესო შეთანხმება უფორმდებათ."

პატარაიას მოუწოდებს სახალხო დამცველის აპარატის წარმომადგენლებს მორალური მხარდაჭერა გაუწიონ, აუხსნან თავისი უფლებები და იმუშაონ მასთან.

ომბუდსმენის წარმომადგენლები ადგილზე იმყოფებიან და საქმის წარმოებას აკვირდებიან.