ვოლოდიმირ ზელენსკიმ საფრანგეთის პრეზიდენტი უკრაინაში მიიწვია. მას სურს ემანუელ მაკრონი დაარწმუნოს, რომ ის, რაც უკრაინაში ხდება, გენოციდია. ამის შესახებ ზელენსკიმ CNN-თან ისაუბრა.

"ვფიქრობ, მას სურს გადადგას გარკვეული ნაბიჯები, რათა რუსეთი დიალოგში ჩაერთოს. მე მას უბრალოდ ვუთხარი, მსურს გაიგოს, რომ ეს არ არის ომი და სხვა არაფერია, თუ არა გენოციდი. მე ის მოვიწვიე. როცა ამის შესაძლებლობა იქნება, ჩამოვა, ნახავს და დარწმუნებული ვარ, რომ გაიგებს", — ამბობს ზელენსკი.

უკრაინის პრეზიდენტი ამბობს, რომ ის იმავე აზრზეა, როგორზეც აშშ-ს პრეზიდენტი — "ის რაც უკრაინაში ხდება გენოციდია". მან ასევე აღნიშნა, რომ სურს, ბაიდენიც ჩავიდეს უკრაინაში.

"შეხედეთ, რა მოხდა ბუჩაში. გასაგებია, რომ ეს ომი კი არა, გენოციდია. მათ უბრალო ხალხი დახოცეს, ჯარისკაცები კი არა, ხალხი. ხალხს ესროდნენ ქუჩებში. ისინი ველოსიპედებით, ავტობუსით ან უბრალოდ ფეხით დადიოდნენ. ქუჩა... ქუჩებში ეყარა ცხედრები", — ამბობს ის.

12 აპრილს ამერიკის შეერთებული შტატების პრეზიდენტმა, ჯო ბაიდენმა მოსახლეობასთან გაზის გაზრდილ ტარიფებზე საუბრისას განაცხადა, რომ რუსეთმა უკრაინაში გენოციდი მოაწყო. ამას უკრაინის პრეზიდენტმა, ვოლოდიმირ ზელენსკიმ ნამდვილი ლიდერის ჭეშმარიტი სიტყვები უწოდა.

საფრანგეთის პრეზიდენტმა, ემანუელ მაკრონმა კი განაცხადა, რომ რუსეთის ქმედებებისთვის გენოციდის წოდებისგან თავს შეიკავებს, რადგან რუსები და უკრაინელები "ძმები არიან".

უკრაინის საგარეო საქმეთა სამინისტრომ განაცხადა, რომ მაკრონის მიდგომა იმედგაცრუებას იწვევს. საგარეოს სპიკერის, ოლეგ ნიკოლენკოს თქმით, უკრაინელ და რუს ხალხს შორის "ძმობის" მითი საბოლოოდ დაიმსხვრა, როდესაც თებერვალში უკრაინაში რუსული რაკეტები გამოჩნდნენ.

კანადის პრემიერმინისტრი ჯასტინ ტრუდო ამბობს, რომ სწორია გენოციდი უწოდო უკრაინაში რუსეთის ქმედებებს. მან პირდაპირ არ გაიმეორა აშშ-ს პრეზიდენტის განცხადება, რომელმაც თქვა, რომ რუსეთმა უკრაინაში გენოციდი მოაწყო.

ამერიკის შეერთებული შტატების სახელმწიფო დეპარტამენტის მაღალჩინოსნის, ვიქტორია ნულანდის განცხადებით კი, აშშ სავარაუდოდ, შეძლებს დაადასტუროს, რომ რუსეთმა უკრაინაში გენოციდი მოაწყო.

14 აპრილს უმაღლესმა რადამ რუსეთის ქმედებები უკრაინელი ერის გენოციდად აღიარა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.