ვიცე პრემიერმა, კახა კალაძემ რუსთავი 2-ის საქმესთან დაკავშირებით ხელისუფლების მხრიდან სასამართლოზე ზეწოლას გამორიცხავს და განმარტავს, რომ ქვეყანაში სასამართლო დამოუკიდებელია და სწორედ მის გადაწყვეტილებას უნდა დაელოდოს ყველა.

"მე გამიჭირდება საუბარი და ვფიქრობ, სწორიც არ იქნება ჩემი მხრიდან, რაიმე სახის განცხადებები გავაკეთო, რადგან ჩემი დღევანდელი თანამდებობიდან გამომდინარე, ჩემი განცხადებები შეიძლება გამოყენებული და აღქმული იყოს ან ერთი მხარის, ან მეორე მხარის მიერ თუნდაც ზეწოლად ან თანადგომად. ამიტომ, დაველოდოთ, სასამართლო ქვეყანაში არის დამოუკიდებელი და შესაბამისად, გადაწყვეტილება, რომელიც იქნება მიღებული, გახდება ცნობილი".

თბილისის სააპელაციო სასამართლოში რუსთავი 2-ის საქმეს მოსამართლეები, ნათია გუჯაბიძე, ნატა ნაზღაიძე და შორენა ყაველაშვილი განიხილავენ. პროცესის პარალელურად სასამართლოს ეზოში აქცია მიმდინარეობს.

ტელეკომპანიის მხარდასაჭერად შეკრებილები არიან ადამიანები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.