ჯანდაცვის მსოფლიო ორგანიზაციის დირექტორმა საზოგადოება გააკრიტიკა, რადგან მისი აზრით, უკრაინის ომზე მთელი ყურადღებაა მიმართული, როცა კრიზისები მსოფლიოს სხვა ნაწილებშიც საკმაოდ მწვავე პრობლემაა. ტედროს ადანომ გებრეიესუსის თქმით, ეთიოპიაშიც საკმაოდ მძიმე კრიზისია, რასაც მსოფლიოს მხრიდან ყურადღება არ ეთმობა და WHO-ს დირექტორმა ამის შესაძლო მიზეზად ის დაასახელა, რომ ეთიოპიაში თეთრკანიანი ადამიანები არ ცხოვრობენ.

ტედროს ადჰანომ გებრეიესუსმა თავისი გამოსვლისას ეჭვქვეშ დააყენა ის საკითხი, რომ მსოფლიო შავკანიან და თეთრკანიან ადამიანთა უსაფრთხოებაზე თანაბრად ზრუნავს. მან ასევე აღნიშნა, რომ ეთიოპიაში, იემენში, ავღანეთსა და სირიაში მიმდინარე საგანგებო სიტუაციებმა მსოფლიოს მხრიდან მხოლოდ მცირე შეშფოთება გამოიწვია განსხვავებით უკრაინის ომისგან, რომელიც ახლა ყურადღების ცენტრშია.

ფოტო: Getty Images

"მთელ დედამიწაზე მილიონობით ადამიანის ჯანმრთელობას ისე არსად ემუქრება საფრთხე, როგორც ეთიოპიის ტიგრეის რეგიონში", — განაცხადა WHO-ს დირექტორმა და დასძინა, რომ ამ რეგიონში დაახლოებით 2000 სატვირთო მანქანას უნდა ჩაეტანა საკვები და მედიკამენტები, თუმცა იქ რეალურად მხოლოდ 20 მანქანა ჩავიდა.

"სანამ ჩვენ აქ ვსაუბრობთ, ხალხი შიმშილით იხოცება. მინდა გულწრფელი ვიყო და ვიტყვი, რომ მსოფლიო ყველა რასას ერთნაირად არ ექცევა. როგორც ჩანს, ზოგი უფრო თანასწორია, ვიდრე სხვები. იმედი მაქვს, რომ სამყარო გონს მოვა და თითოეული ადამიანის სიცოცხლეს თანაბრად დააფასებს", — განაცხადა WHO-ს დირექტორმა.