უკრაინაში რუსეთის შეჭრიდან დღემდე 26 653 ბავშვი დაიბადა. ამის შესახებ უკრაინის იუსტიციის სამინისტროში განაცხადეს. სამინისტროს თქმით, მშობლები შვილებს ამერიკული ტანკსაწინააღმდეგო სარაკეტო სისტემის სახელს, ჯაველინს არქმევენ, რომელსაც უკრაინელი სამხედროები მტერთან საბრძოლველად იყენებენ.

"ზოგიერთისთვის ომმა, რომელშიც უკრაინელები უკვე მეორე თვეა იბრძვიან ჩვენი სახელმწიფოს დამოუკიდებლობისა და სუვერენიტეტისთვის, გადამწყვეტი როლი ითამაშა მათი პატარებისთვის სახელის შერჩევისას", — აცხადებს იუსტიციის სამინისტრო.

ბავშვების უმეტესობა დაიბადა ლვოვის, დნეპროპეტროვსკის, ოდესის, ვინიცის, ზაკარპატიისა და ივანო-ფრანკოვსკის რეგიონებში.

ამასთანავე, ომის დაწყებიდან დღემდე უკრაინაში 24,8 ათასი ქორწინება დარეგისტრირდა. საქორწილო ცერემონიები ხმამაღალი ზეიმების გარეშე იმართებოდა, სტუმრებს შორის კი მხოლოდ ახლო ნათესავები და მეგობრები იყვნენ.