ამერიკის შერთებული შტატების სახელმწიფო დეპარტამენტის ანგარიშის მიხედვით, 2021 წელს LGBTQI+ პირებზე თავდასხმის შემთხვევები გაიზარდა და კულმინაციას 5 ივლისის მოვლენების დროს მიაღწია.

"ამ წლის განმავლობაში გაიზარდა LGBTQI+ ადამიანებზე თავდასხმის შემთხვევები და მათზე, ვინც თემის წევრად აღიქმება, ძირითადად ტრანსგენდერ ქალებზე. ძალადობრივმა პროტესტმა და არეულობამ კულმინაციას მიაღწია თბილისი პრაიდის დროს 5 ივლისს. ინდივიდუალური თავდასხმებიც გაიზარდა, ასევე", — აღნიშნულია ანგარიშში.

5-6 ივლისს ჰომოფობიურ და ძალადობრივი ჯგუფების თავდასხმის შედეგად მედიის 53 წარმომადგენელი დაშავდა. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.