ახალგაზრდა იურისტთა ასოციაციის ცნობით, სამოქალაქო აქტივისტი, სამირა ბაირამოვა ორგანიზაციის მოთხოვნის საფუძველზე, პროკურატურამ დაცვის სპეციალურ პროგრამაში ჩართო.

საიას განმარტებით, აქტივისტის, რომელიც ძალადობრივი და პრორუსული ჯგუფების მუქარის სამიზნე გახდა, პროგრამაში ჩართვა უსაფრთხოების დაცვის მიზნით მოითხოვა, რადგან მის მიმართ დევნის ნიშნები იკვეთებოდა.

"წარდგენილი მოთხოვნები დაკმაყოფილდა. 2022 წლის 04 აპრილს საია-ს ეცნობა, რომ მიმდინარეობს გამოძიება და ტარდება საგამოძიებო და საპროცესო მოქმედებები, მათ შორის დაიკითხნენ მოწმეები და შესწავლილი იქნება საია-ს მიერ განცხადებაში მითითებული საკითხები. ასევე, პროკურატურამ სამირა ბაირამოვას მიმართ გამოიყენა დაცვის სპეციალური ღონისძიება და მას ამ ეტაპზე საფრთხე აღარ ემუქრება. თუმცა, აღსანიშნავია, რომ დამნაშავე პირების გამოკვეთა და მათთვის ბრალის წარდგენა ამ დრომდე არ მომხდარა", — ნათქვამია განცხადებაში.

სამირა ბაირამოვა პროკურატურამ დაზარალებულად 22 მარტს სცნო. მას მარნეულში ალტ-ინფოს ოფისზე ბანერის უკრაინისა და ევროკავშირის დროშის ფერებში შეღებვის გამო სიცოცხლის მოსპობით ემუქრებოდნენ. გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

პარალელურად, შსს-მ ალტ-ინფოს ადგილობრივი ოფისის ხელმძღვანელის საჩივრის საფუძველზე ადმინისტრაციული სამართადარღვევის საქმის წარმოება დაიწყო და მის მიმართ იერსახის დამახინჯების მუხლით ოქმი შეადგინა.

საიას შეფასებით, იმ ფონზე, როდესაც მოძალადე ჯგუფების მიერ 5-6 ივლისს განხორციელებული ჯგუფური ძალადობის ორგანიზება და ასეთი ქმედებებისკენ საჯაროდ მოწოდება ამ დრომდე დაუსჯელია, ეს მათ ახალისებს და გამოძიების მიმართ ნდობას ამცირებს.