ოსკაროსანი რეჟისორის ასგარ ფარადის ყოფილი სტუდენტი ამტკიცებს, რომ რეჟისორმა 2021 წლის ფილმის A Hero (გმირი) იდეა მისი ერთ-ერთი დოკუმენტური ფილმიდან აიღო.

The Hollywood Reporter-ის ცნობით, თავდაპირველად ასგარ ფარადიმ უჩივლა თავის ყოფილ მოსწავლეს, სახელად აზადე მასიჰზადეს, ცილისწამებისთვის, რის შემდეგაც აზადემ საპასუხო საჩივარი შეიტანა. ორივე შემთხვევაში სასამართლომ მასიჰზადეს სასარგებლოდ მიიღო გადაწყვეტილება. ახლა საქმე მეორე მოსამართლეს გადაეცემა, რომლის განჩინებაც გადაწყვეტს, დაისჯება თუ არა ფარადი. ეს გადაწყვეტილება გასაჩივრებას ექვემდებარება.

აზადე მასიჰზადემ 2014 წელს გადაიღო მოკლემეტრაჟიანი დოკუმენტური ფილმი ციხის პატიმრის შესახებ, რომელმაც სასჯელის მოხდის შემდეგ ფულით სავსე ჩანთა იპოვა და მფლობელს დაუბრუნა. ფილმის სახელწოდებაა All Winners, All Losers (ყველა გამარჯვებულია, ყველა წაგებულია) და ის მასიჰზადემ მაშინ გადაიღო, როცა ფარადის მოსწავლე იყო.

ფარადის 2021 წლის ფილმის გმირი სიუჟეტიც მსგავს ელემენტებს შეიცავს. სახელოვანი ფილმების A Separation (გაყრა) და The Salesman (გამყიდველი) რეჟისორის ეს ახალი ნამუშევარი გასულ წელს კანის კინოფესტივალზე აჩვენეს და ჟიურის გრან-პრიც კი მიიღო.

გმირის სცენარის ავტორად მხოლოდ ასგარ ფარადია მითითებული.

აზადე მასიჰზადემ The Hollywood Reporter-ს განუცხადა, რომ ფარადი მასზე ზეწოლას ახდენდა და აიძულებდა, რომ ხელი მოეწერა დოკუმენტზე, რომელიც ამ ისტორიაზე საავტორო უფლებებს მთლიანად მას გადასცემდა ისე, რომ თავად აზადე ფინანსურ სარგებელს ვერ მიიღებდა.

ფოტო: Amazon

ფარადი ადვოკატის მეშვეობით აცხადებს, რომ მისი ფილმის მთავარი იდეა გაცილებით ადრე გაჩნდა და ის შთაგონებული იყო ბერტოლტ ბრეხტის პიესით გალილეოს ცხოვრება.

ფარადის საჩივარი მასიჰზადეს წინააღმდეგ ცილისწამების ბრალდებით სასამართლომ საკმარისი მტკიცებულებების არქონის გამო არ მიიღო.

შემდგომ კი მასიჰზადეს სარჩელი პლაგიატის შესახებ სასამართლოს თავდაპირველი განჩინებით მასიჰზადეს სასარგებლოდ განიხილეს. უახლოეს მომავალში გახდება ცნობილი, რა სასჯელს გამოუტანს ირანის სასამართლო პლაგიატის გამო ასგარ ფარადის.