შინაგან საქმეთა სამინისტროს განცხადებით, თბილისში, აფრიკის დასახლებაში მდებარე საქართველოს ბანკის ექსპრესფილიალზე ყაჩაღური თავდასხმის ბრალდებით 2 პირი დააკავეს.

უწყების ინფორმაციით, ავტომატური ცეცხლსასროლი იარაღითა და პისტოლეტით შეიარაღებულმა ბრალდებულებმა მოლარე-ოპერატორს ფული გასტაცეს. დაცვის პოლიციის თანამშრომელმა, გაისროლა, რა დროსაც ორივე ბრალდებული მსუბუქად დაიჭრა, თუმცა მათ ბანკის ტერიტორიის დატოვება მოახერხეს.

"ცეცხლსასროლი იარაღის მუქარით მოლარე-ოპერატორს ფული გასტაცეს, რა დროსაც დაცვის პოლიციის თანამშრომელმა, დანაშაულის აღკვეთის მიზნით, ცეცხლსასროლი იარაღიდან გასროლა განახორციელა.

ორივე თავდამსხმელი მსუბუქად დაიჭრა, თუმცა ბრალდებულებმა ბანკის ტერიტორიის დატოვება მოახერხეს, ჩასხდნენ იქვე მდგომ ავტომობილში და იარაღის მუქარით აიძულეს მძღოლი, რომ ისინი კონკრეტულ მისამართზე წაეყვანა", — ვკითხულობთ შსს-ს განცხადებაში.

როგორც უწყებაში ამბობენ, დაკავების ადგილას, საცხოვრებელი ბინის ფარდულის ჩხრეკისას ამოიღეს დანაშაულის ჩადენის იარაღები, ხოლო ავტომანქანიდან, რომლითაც თავდამსხმელებმა შემთხვევის ადგილი დატოვეს, ამოღებულია ბანკიდან წაღებული ფულის ნაწილი.

გამოძიება საქართველოს სისხლის სამართლის კოდექსის 179-ე მუხლის მე-2 ნაწილის ბ ქვეპუნქტით და 236-ე მუხლის მე-3 და მე-4 ნაწილებით მიმდინარეობს, რაც ჯგუფურად ჩადენილ ყაჩაღობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს. დანაშაული 6-დან 9 წლამდე ვადით თავისუფლების აღკვეთას ითვალისწინებს.