საოკუპაციო რეჟიმის წარმომადგენელს, დე ფაქტო პრეზიდენტს, ანატოლი ბიბილოვს სურს, რომ საქართველოს ოკუპირებული ტერიტორია რუსეთის ნაწილი გახდეს. მისი თქმით, მალე მიიღებს ზომებს, რომ ოკუპირებული ცხინვალის რეგიონი რუსეთის ნაწილი გახდეს, მაგრამ რა კონკრეტულ სამართლებრივ ნაბიჯებზეა საუბარი ბიბილოვს არ აღუნიშნავს.

პროპაგანდისტული შინაარსის განცხადებაში ის ოკუპირებულ ცხინვალის რეგიონს "რუსეთის ისტორიულ ნაწილად" მოიხსენიებს და ფაქტების დამახინჯებით საუბრობს, რომ თითქოს 2008 წელს რუსეთმა ცხინვალი დაიცვა.

"უახლეს ისტორიაში რუსული სამყაროს პირველი აღორძინება, იმის გაგება, რომ არსებობს ხაზი, რომლის გადაკვეთაც შეუძლებელია, მოხდა სწორედ აქ — სამხრეთ ოსეთში — 2008 წელს, როდესაც რუსეთმა გადაწყვიტა დაეცვა ოსი ხალხი და ეღიარებინა რესპუბლიკის დამოუკიდებლობა. სამხრეთ ოსეთის, რისთვისაც ჩვენ ყოველთვის მადლობელი ვიქნებით რუსეთის ფედერაციის ხელმძღვანელობისა და ხალხის", — აცხადებს ის.

ეს პირველი შემთხვევა არ არის, როცა დე ფაქტო პრეზიდენტი ღიად აჟღერებს პოზიციას, რომ რუსეთის ნაწილად ყოფნა სურს, თუმცა ამჯერად მან კონკრეტული ზომების მიღებაზე ისაუბრა.