ზელენსკიმ მსოფლიოს მოუწოდა, ომის დაწყებიდან ერთი თვის თავზე, 24 მარტს გამოვიდნენ ქუჩებში მარშზე და მხარი დაუჭირონ უკრაინას. ვიდეომიმართვაში, რომელიც უკრაინის პრეზიდენტმა სამ ენაზე ჩაწერა, მსოფლიოს ყველა მოქალაქეს, უკრაინელებსა და რუსებს მიმართავს.

ზელენსკი ამბობს, რომ ეს ომი არ არის მხოლოდ უკრაინის წინააღმდეგ და რუსეთმა დაიწყო ომი თავისუფლების წინააღმდეგაც. მისი თქმით, რაც ხდება, მხოლოდ დასაწყისია და რუსეთს სურს შეუზღუდოს თავისუფლება ყველა ადამიანს ევროპაში.

ზელენკიმ ხაზი გაუსვა, რომ ოკუპანტი ქვეყანა ცდილობს აჩვენოს, თითქოს ადამიანი მნიშვნელოვანი არ არის, ისევე, როგორც სხვა ყველაფერი, რაც ადამიანებად გვაქცევს. მისი თქმით, ეს არის მიზეზი, რომლის გამოც ყველამ უნდა შეაჩეროს რუსეთი.

"მსოფლიომ უნდა შეწყვიტოს ომი. მადლობელი ვარ ყველასი, ვინც მოქმედებს უკრაინის, თავისუფლების მხარდასაჭერად. მაგრამ ომი გრძელდება. მშვიდობიანი ხალხის წინააღმდეგ ტერორი გრძელდება. უკვე ერთი თვე გავიდა! ამდენი ხანი! ეს გულს მიტეხავს მე და ყველა უკრაინელს და ყველა თავისუფალ ადამიანს დედამიწაზე. ამიტომ გთხოვ, შეეწინააღმდეგოთ ომს!" — განაცხადა პრეზიდენტმა.

უკრაინის პრეზიდენტმა მოუწოდა ყველას, 24 მარტს გამოვიდნენ გარეთ და გამოხატონ მკაფიო მხარდაჭერა.

"გამოდით თქვენი ოფისებიდან, სახლებიდან, სკოლებიდან, უნივერსიტეტებიდან. გამოდით მშვიდობის სახელით. გამოდით უკრაინის სიმბოლოებით, უკრაინის მხარდასაჭერად, თავისუფლების მხარდასაჭერად, სიცოცხლის მხარდასაჭერად.

გამოდით თქვენს ბაღებში, ქუჩებში. გახადეთ თქვენი თავი ხილვადი და მოსმენადი. თქვით, რომ ხალხი მნიშვნელოვანია, თავისუფლება მნიშვნელოვანია, მშვიდობა მნიშვნელოვანია, უკრაინა მნიშნველოვანია. 24 მარტის მარშზე თქვენს ქალაქებში. ყველა ერთისთვის, ერთად, ვისაც სურს შეაჩეროს ომი".

რაც შეეხება რუსეთის მოქალაქეებს, ზელენსკიმ მათ მოუწოდა, შეეწინაღმდეგონ ომს, რომელზეც ატყუებენ და რომლის გამოც აღარიბებენ. მანვე თქვა, რომ თუ რუსებს შეუძლიათ დატოვონ ქვეყანა, რათა არ გადაიხადონ გადასახადები და ამ ფორმით არ დააფინანსონ ომი, ეს უნდა გააკეთონ.

"ახლა მინდა ცალკე მივმართო რუსეთის მოქალაქეებს. დარწმუნებული ვარ, თქვენს შორის ბევრია ისეთი, ვისაც სახელმწიფოს პოლიტიკა ეზიზღება. ვისაც უკვე გული ერევა იმაზე, რასაც ხედავს ტელევიზორში, იმაზე, როგორ გატყუებენ თქვენივე პროპაგანდისტები ინტერნეტში. პროპაგანდისტები, რომელსაც ფულს თქვენივე გადასახადებიდან უხდიან და იტყუებიან ომზე, რომელიც თქვენი ფულით ფინანსდება და რომელიც აღარიბებს რუსეთის ყველა მოქალაქეს, ყოველ დღე უფრო მეტად და მეტად".

ერთი თვის წინ, 24 თებერვლის დილით რუსეთი უკრაინაში შეიჭრა და ფართომასშტაბიანი ომი დაიწყო, რომელსაც დღემდე "სამხედრო ოპერაციას" უწოდებს. რუსეთი არ აღიარებს, რომ აწარმოებს ომს იმის მიუხედავად, რომ უკვე დაკარგა ათასობით ჯარისკაცი, მოკლა ასეულობით ბავშვი და ათასობით მშვიდობიანი მოქალაქე, დაანგრია ათეულობით ქალაქი და ათასობით საცხოვრებელი სახლი. ეს ციფრები რეალობას სრულად არ ასახავს, მაგრამ აჩვენებს პუტინის სახეს, რომელიც არამხოლოდ თავად არ უწოდებს ომს ომს, არამედ სხვასაც უკრძალავს — კანონებით, რეპრესიებით, დაკავებებით.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში