რელიგიის საკითხთა სახელმწიფო კომისიამ რელიგიურ ორგანიზაციებს მიმართა და მათ სასულიერო პირების სია, მათი პირადობის მოწმობების ასლები, საკონტაქტო მონაცემები, სასულიერო ხარისხი და ამჟამინდელი მსახურების ადგილის შესახებ ინფორმაციის მიწოდება სთხოვა. სააგენტოში ინფორმაციის მოთხოვნას "რელიგიური რუკის" შექმნით ხსნიან, თუმცა, ამ ეტაპზე არაა ცნობილი რა მიზანს ემსახურება პერსონალი მონაცემების შეგროვება.

რელიგიის სააგენტოში აღნიშნავენ, რომ მსგავსი შინაარსის მოთხოვნა ყველა რელიგიურ ორგანიზაციას, მათ შორის საქართველოს მართლმადიდებლურ ეკლესიასაც გაეგზავნათ, პასუხის გაცემა კი ნებაყოფლობითია. სააგენტოში On.ge-ს დაპირდნენ, რომ უწყების ხელმძღვანელის განმარტება აღნიშნულ საკითხზე მოგვიანებით გახდება ხელმწისაწვდომი.

ევანგელურ-ბაპტისტური ეკლესიის ხელმძღვანელმა, მერაბ გაფრინდაშვილმა On.ge-ს განუცხადა, რომ ისინი არ აპირებენ მოთხოვნილი ინფორმაციის მიწოდებას.

"ჩვენ ვამბობთ, რომ ეს პირადი, პერსონალური მონაცემები, მათ შორის სასულიერო პირების, უნდა იყოს დაცული," - ამბობს ევანგელურ-ბაპტისტური ეკლესიის ხელმძღვანელი.

ფოტო: ევანგელურ-ბაპტისტური ეკლესია, On.ge

პარტია გირჩის წევრები მიიჩნევენ, რომ ეს არის სახელმწიფოს პასუხი მათ ინიციატივაზე. კერძოდ, გირჩის წევრებმა 2017 წლის მარტში დაარეგისტრირეს რელიგიური ორგანიზაცია საქართველოს ქრისტიანული, ევანგელისტური, პროტესტანტული ეკლესია - ბიბლიური თავისუფლება.

გირჩის წევრთა მიერ დაფუძნებული რელიგიური ორგანიზაცია წვევამდელებს ანიჭებს მღვდელმსახურის წოდებას. ორგანიზაცია ამის დამადასტურებელ მოწმობასაც გასცემს, რომელსაც ხელს აწერენ გირჩის წევრი, მთავარი მღვდელმსახური ნიკა ობოლაძე და ორი ეპისკოპოსი, ასევე გირჩის წევრები - არჩილ ხაჩიძე და ლევან ჯგერენაია. აღნიშნული ცნობა კი, არსებული კანონმდებლობისა და პრაქტიკის მიხედვით, საკმარისია სავალდებულო სამსახურის გადასავადებლად.