საქართველოს მეოთხე პრეზიდენტის, გიორგი მარგველაშვილის განცხადებით, აპირებს სასამართლოს მეგობრის ინსტიტუტის გამოყენებას და ჩამოაყალიბებს პოზიციას იმისათვის, რომ დაიცვას კონსტიტუცია. მისივე თქმით, კარგი იქნება, თუ ამ პროცესს მიხეილ სააკაშვილიც შეუერთდება და კონსტიტუციის დასაცავად 3 პრეზიდენტი გაერთიანდება.

"ჩვენ ვხედავთ კაპიტულანტური მთავრობის მცდელობას, რომ ყველა გააჩეროს და გააჩუმოს და ემზადებიან იმისათვის, რომ რუსეთს გადასცენ საქართველო, გადაუფორმონ და ამ ნოტარიულ აქტში ყველა უნდა იყოს გაჩუმებული. სხვანაირად ეს პოლიტიკურად არაფერს არ შეიძლება ნიშნავდეს.

აქედან გამომდინარე, მე გამოვიყენებ სასამართლოს მეგობრის ინსტიტუტს, ჩამოვაყალიბებ ჩემს პოზიციას იმისათვის, რომ დავიცვათ კონსტიტუცია. კარგი იქნება თუ ამ პროცესს შემოუერთდება პრეზიდენტი მიხეილ სააკაშვილი და შევძლებთ, რომ კონსტიტუციის დასაცავად გაერთიანდეს 3 პრეზიდენტი. ამ ფორმით, ბუნებრივია, ჩვენ შევძლებთ, რომ საქართველოს კონსტიტუციური წყობა არ იქნას შერყვნილი ამ კოლაბორაციონისტული მთავრობის მიერ", — ამბობს მარგველაშვილი.

ქართული ოცნება პრეზიდენტ სალომე ზურაბიშვილის წინააღმდეგ საკონსტიტუციო სასამართლოს მიმართავს. პარლამენტში პრეზიდენტის კრიტიკულ გამოსვლას მმართველმა გუნდმა კრიტიკული განცხადებით უპასუხა. პარტიის პოლიტიკური საბჭოს განცხადებაში ვკითხულობთ, რომ გასული თვეების განმავლობაში შედგა არაერთი შეხვედრა მთავრობის წარმომადგენლებსა და ზურაბიშვილს შორის, სადაც მას არაერთგზის განემარტა კონსტიტუციის შინაარსი, თუმცა, "ოცნების" თქმით, უშედეგოდ.