სახალხო დამცველი პენიტენციურ სამსახურს მოუწოდებს, ექსპრეზიდენტი, მიხეილ სააკაშვილი სამედიცინო გამოკვლევების ჩასატარებლად დაუყონებლივ გადაიყვანონ და სრულფასოვანი სამედიცინო მომსახურება გაუწიონ. მისი განცხადებით, აპარატის რწმუნებულის სააკაშვილთან ვიზიტმა ამის საჭიროება ცხადყო.

"2022 წლის 9 მარტს სახალხო დამცველის რწმუნებულებმა განახორციელეს ვიზიტი #12 პენიტენციურ დაწესებულებაში, სადაც შეხვდნენ პატიმარ მიხეილ სააკაშვილს და გაესაუბრნენ სამედიცინო პერსონალს. ვიზიტმა ცხადყო, რომ აუცილებელია მიხეილ სააკაშვილისთვის რელევანტური გამოკვლევების შესაბამისი პროფილის კლინიკაში დაუყოვნებლივი ჩატარება და შემდგომი სამედიცინო მომსახურების მიწოდება", — ნათქვამია განცხადებაში.

ლომჯარიას თქმით, პენიტენციური დაწესებულების ექიმისგან მიღებული ინფორმაციით, შიმშილობის ფონზე ექსპრეზიდენტის მდგომარეობა გაუარესებულია. რიგი მაჩვენებლები და ჩივილები კი განსაკუთრებით საყურადღებოა.

მოწოდებული ინფორმაციით, პენიტენციური სამსახურის ინიციატივით, N12 დაწესებულებაში 7 მარტს იმყოფებოდნენ სამოქალაქო კლინიკის ექიმები, რომლებმაც შეამოწმეს მიხეილ სააკაშვილის ჯანმრთელობის მდგომარეობა და დაადგინეს დამატებითი გამოკვლევების ჩატარების საჭიროება სამოქალაქო ტიპის კლინიკაში, სასწრაფო დაყოვნებული წესით, რაც საკანონმდებლო აქტების შესაბამისად, უნდა ჩატარდეს 2-5 დღეში", — ამბობს ის.

სახალხო დამცველი, ასევე, აღნიშნავს, რომ 19 იანვარს გაცემული რეკომენდაციის მიუხედავად, სააკაშვილისთვის თავის ტვინის მაგნიტურ-რეზონანსულ ტომოგრაფია, ამ დრომდე არ ჩატარებულა.

გარდა ამისა, განცხადებაში ნათქვამია ისიც, რომ ბოლო ორი თვის განმავლობაში პატიმარი რეკომენდირებულ და დაგეგმილ სამედიცინო მომსახურებას ვერ იღებს, რის გამოც, ფიქრობენ, რომ 7 მარტს დაგეგმილი გამოკვლევებიც, შესაძლოა, არ ჩატარდეს ან გაჭიანურდეს.

"ადამიანის უფლებათა ევროპული სასამართლოს მიერ დადგენილი სტანდარტით, პატიმრისთვის დროული და ყოველმხრივი, ადეკვატური მკურნალობის მიუწოდებლობა, ზუსტი დიაგნოზის განუსაზღვრელობა და სათანადო სამედიცინო მომსახურების გაუწევლობა შესაძლოა გაუთანაბრდეს ადამიანის უფლებათა კონვენციის მე-3 მუხლის დარღვევას, რაც გულისხმობს წამებას, არაადამიანურ ან/და დამამცირებელ მოპყრობას", — განმარტებულია განცხადებაში.

სააკაშვილმა შიმშილობა 10 მარტს შეწყვიტა. ექსპრეზიდენტმა თქვა, რომ ახლა საჭიროა "საღი აზრი, ჯანმრთელობა, სრული მობილიზაცია და სიძლიერე, სისუსტის ნაცვალად". სააკაშვილმა თქმით, მიიღო წერილი მებრძოლებისგან, რომლებიც უკრაინას იცავენ, რომ შეეწყვიტა შიმშილობა. მან შიმშილობა კიდევ ერთხელ 21 თებერვალს სასამართლო პროცესზე გამოაცხადა.