სოციალურ ქსელში მოხმარებლები აქტიურად წერენ, რომ მაღაზიებში პროდუქტზე დეფიციტია. ასევე, აქვეყნებენ ფოტოებს, სადაც ჩანს, რომ დახლები ცარიელია.

განსაკუთრებული აქცენტი შაქარზე კეთდება. მომხმარებელთა ნაწილი ამ პროდუქტზე არსებულ დეფიციტს რეგიონში არსებულ დაძაბულობას უკავშირებს.

რეალურად, შაქრის მთავარი იმპორტიორები ბრაზილია, თურქეთი და პოლონეთია. 2021 წელს საქართველოში სულ 120,7 ტონა, 60,35 მლნ დოლარის შაქარი შემოვიდა.

2021 წელს შაქრის ტოპ იმპორტიორი ქვეყნები საქართველოში:

1. ბრაზილია — $28,2 მლნ;
2. თურქეთი — $14,2 მლნ;
3. პოლონეთი — $10,6 მლნ;
4. მექსიკა — $4 მლნ;
5. გერმანია — $1,3 მლნ;
6. საფრანგეთი — $1 მლნ;
7. ნიდერლანდები — $610 ათასი;
8. ბელარუსი — $102 ათასი;
9. აზერბაიჯანი — $100 ათასი;
10. უკრაინა — $76 ათასი;
11. კოლუმბია — $59 ათასი;
12. რუსეთი — $35 ათასი;
13. იტალია — $33 ათასი;
14. სომხეთი — $11 ათასი;
15. ესპანეთი — $3 ათასი;

სოფლის მეურნეობის მინისტრი, ოთარ შამუგია ამბობს, რომ სურსათისა და პირველადი მოხმარების პროდუქციის მარაგების კუთხით არანაირი დეფიციტი არაა.

მინისტრი მსხვილი სავაჭრო ქსელების და სურსათისა და პირველადი მოხმარების პროდუქციის იმპორტიორ კომპანიებს შეხვდა, სადაც თქვა, რომ ბაზარზე პროდუქციის სტაბილური მიწოდების შენარჩუნების პარალელურად კომპანიებმა სოციალური პასუხისმგებლობით უნდა იმოქმედონ, რათა "ფასების უსაფუძვლო ზრდა" არ მოხდეს.

"დღეს არსებულ ვითარებაში, მნიშვნელოვანია როგორც სახელმწიფოს მხრიდან საჭირო მიმართულებების მხარდაჭერა, ასევე ბიზნესისგან განსაკუთრებული პასუხისმგებლობა. იმპორტიორებისა და სავაჭრო ქსელების წარმომადგენლებისგან მივიღეთ ინფორმაცია არსებული მდგომარეობის შესახებ. სრული პასუხისმგებლობით ვაცხადებ, რომ მარაგების მხრივ არანაირი დეფიციტი არ არსებობს. შეხვედრაზე შევთანხმდით, რომ მაქსიმალურ კოორდინაციაში ვიმუშავებთ იმპორტიორებთან და მიმწოდებლებთან", — თქვა შამუგიამ.

სამინისტროში აღნიშნავენ, რომ შესაბამისი სამსახურები ქვეყანაში სურსათის შეფერხებული მიწოდებისა და მარაგების შევსების მონიტორინგს მუდმივ რეჟიმში ახორციელებენ.

საქართველოს დისტრიბუციის ასოციაციის ხელმძღვანელი, ივა ჭყონია ამბობს, რომ, ამ ეტაპზე, ბაზარზე "სტაბილური ვითარებაა". ის მომხმარებლებს მოუწოდებს, ჭარბი შესყიდვებით არ დააზიანონ საკუთარი თავი. დისტრიბუტორთა ასოციაციაში იმასაც ამბობენ, რომ პროდუქტების ამჟამინდელი დეფიციტი პანიკური შესყიდვებით არის გამოწვეული.

"გარკვეულ ბრენდებთან დაკავშირებული ჩავარდნები გამოწვეულია ლოგისტიკური ჯაჭვის წყვეტიდან, მაგრამ თუ დღეს გარკვეული ბრენდის ზეთი, წიწიბურა თუ შაქარი მომხმარებელს არ დახვდათ დახლზე, ეს არ ნიშნავს, რომ ორ-სამ დღეში არ იქნება, ამიტომ მოვუწოდებ მოსახლეობას, რომ ჭარბი შესყიდვებით არ დააზიანონ არც საკუთარი თავი და არც სხვა მომხმარებელი", — თქვა მან.

კომპანია აგარის შაქარი ბიზნესპარტნიორთან ამბობს, რომ სავაჭრო ქსელებში შაქრის დეფიციტის გამო იმპორტს აზერბაიჯანიდან გეგმავენ. აგარის შაქარში იმასაც აღნიშნავენ, რომ ქარხანას გააჩნია საკმარისი თეთრი შაქრის ნაშთები, რაც პანიკის საფუძველს არ ქმნის.

ლონდონის ბირჟაზე 1 ტონა შაქრის ღირებულება ამჟამად დაახლოებით 530 დოლარია, რაც ნიშნავს იმას, რომ ამ პროდუქტზე არსებული ფასები წლის დასაწყისთან შედარებით 8%-ით არის გაზრდილი.

როგორც ჩანს, მომხმარებელთა ნაწილი რეგიონში არსებული ომის ფონზე პროდუქტების მარაგებს ქმნის, რაც ზოგიერთი სუპერმარკეტისთვის დეფიციტის გამომწვევი მიზეზია.