Fitch-მა რუსეთის სუვერენული რეიტინგი B-დან C-დონემდე შეამცირა და განაცხადა, რომ რუსეთის დეფოლტი გარდაუვალია. სარეიტინგო სააგენტო ამბობს, რომ რუსეთის მიმართ დაწესებული სანქციბი ქვეყნის ვალის მომსახურების შესაძლებლობას ძირს უთხრის.

"რუსეთის რეიტინგის C დონემდე შემცირება აჩვენებს Fitch-ის ხედვას, რომ ქვეყნის დეფოლტი გარდაუვალია" — წერს სარეიტინგო სააგენტო.

Fitch Group-მა რუსეთში კომერციული ოპერაციების დაუყოვნებლივ შეჩერების გადაწყვეტილებაც მიიღო. აქ საკრედიტო რეიტინგების წარმოება და ის სერვისები იგულისხმება, რომელსაც Fitch Group რუსეთში Fitch Ratings და Fitch Solutions-ის საქმიანობის ფარგლებში ახორციელებდა. სარეიტინფო სააგენტო საკუთარ გაცხადებაში წერს, რომ მომხმარებელებისთვის დამოუკიდებელი ანალიტიკური ანგარიშების მიწოდებას გააგრძელებს.

რუსეთს საკრედიტო რეიტინგი შეუმცირა და მოსალოდნელი დეფოლტის ზონაში გადაიყვანა საერთაშორისო სარეიტინგო სააგენტომ S&P Global-მაც. მათი განმარტებით, ეს ნიშნავს იმას, რომ ქვეყანა შესაძლებელია ვალის გადახდისუუნარო გახდეს.

S&P Global-მა რუსეთს სუვერენული რეიტინგი BB-plus-დან CCC-minus-მდე შეუმცირა, რაც მისი საინვესტიციო პოტენციალის ვარდნას ნიშნავს. სარეიტინგო სააგენტოს თქმით, მოსალოდნელია რეიტინგის კიდევ უფრო შემცირებაც.

რუსეთის ეკონომიკა ღრმა კრიზისის წინაშე დგას. ქვეყანას ერთმანეთის მიყოლებით ტოვებენ საერთაშორისო კომპანიები. დახურულია მოსკოვის საფონდო ბირჟა, ხოლო რუსული აქციებით ვაჭრობა შეჩერებულია ლონდონის ბირჟაზე. რუბლი დოლართან მიმართები რეკორდულად არის გაუფასურებული — დრამატულად მცირდება რუსი ოლიგარქების ქონებაც.

JPMorgan-ის შეფასებით, მიმდინარე წლის მეორე კვარტალში რუსეთის ეკონომიკის 35%-ით შემცირებაა მოსალოდნელი. ამასთან, საინვესტიციო ბანკი ელოდება, რომ 2022 წელს რუსეთის ეკონომიკა 7%-ით შემცირდება.

გუშინ, 8 მარტს, ცნობილი გახდა, რომ აშშ რუსულ ენერგორესურსების იმპორტზე აკრძალვას აწესებს. ბაიდენის თქმით, შეერთებულმა შტატებმა მიზანში ამოიღო რუსეთის ეკონომიკის მთავარი არტერია. როგორც ცნობილია, წლის ბოლომდე რუსული ნავთობის იმპორტს ბრიტანეთიც აკრძალავს.