კლინიკა "ვივამედის" კლინიკური დირექტორი, ზურაბ ჩხაიძე IPN-თან ამბობს, რომ იანვარში გლდანის მე-8 დაწესებულებიდან შემოყვანილ პატიმარ იოსებ გორგაძეს მრავლობითი ტრავმები ჰქონდა, მას ყველა საჭირო მკურნალობა ჩაუტარდა, მაგრამ გადარჩენა ვერ მოხერხდა.

"ლეტალური გამოსავალი დადგა გუშინ, 20:00 საათზე. მხოლოდ და მხოლოდ შემიძლია გითხრათ, რომ ეს იყო პოლიტრავმა, პაციენტს ყველა აუცილებელი სამკურნალო ღონისძიება ჩაუტარდა, თუმცა, ამის მიუხედავად, მაინც ლეტალური გამოსავალი დადგა", — აცხადებს ჩხაიძე.

გამოცემის ცნობით, სპეციალური საგამოძიებო სამსახურში აცხადებენ, რომ მათ კლინიკა "ვივამედში" 46 წლის იოსებ გორგაძის გარდაცვალებასთან დაკავშირებით გამოძიება დაიწყეს.

გამოძიება სისხლის სამართლის კოდექსის 342-ე მუხლის მეორე ნაწილით დაიწყეს, რაც სამსახურებრივ გულგრილობას გულისხმობს, რამაც ადამიანის სიცოცხლის მოსპობა გამოიწვია.

მიმდინარე წლის იანვარში, გლდანის მე-8 დაწესებულებიდან კლინიკა "ვივამედში" დაზიანებებით გადაყვანილი 46 წლის პატიმარი, იოსებ გორგაძე გარდაიცვალა.

პატიმრის ადვოკატის, მუხრან ღურწკაიას თქმით, პატიმარი თითქმის სამი თვე კომაში იყო.

"წუხელ, დაახლოებით, 22:00 საათზე, ოჯახს შეატყობინეს, რომ გარდაიცვალა იმ დაზიანებებით, რა დაზიანებებითაც ის გლდანის მე-8 დაწესებულებიდან გადაიყვანეს. დაახლოებით, 3 თვე იბრძოლა სიცოცხლის გადარჩენისთვის, მაგრამ სამწუხაროდ, მისი გადარჩენა ვერ მოხერხდა. გამოძიებას დღემდე არანაირი შედეგი არ დაუდია, ბრალდებული არავინაა და მიუხედავად მძიმე დაზიანებებისა, იუსტიციის სამინისტროს საგამოძიებო ნაწილმა გამოძიება სსკ-ის 118-ე მუხლით დაიწყო, რაც ჯანმრთელობის დაზიანებას გულისხმობს. ვინაიდან გარდაცვალების ფაქტი დადგა, ახლა გამოძიება სპეციალურმა საგამოძიებო სამსახურმა დაიწყო", — აცხადებს ადვოკატი.