სულ ახლახან ვერაზე თოდუას კლინიკის ახალი ფილიალი გაიხსნა. ის უახლესი აპარატურითა და ტექნოლოგიებითაა აღჭურვილი და პაციენტებს დიაგნოსტიკის მრავალფეროვან საშუალებებსა და სრულ ამბულატორიულ მომსახურებას სთავაზობს. ამასთან ერთად, თოდუას კლინიკის ამ ფილიალში ნაცნობი სერვისების გარდა, ახალი, პედიატრიული მომსახურებაც იქნება ხელმისაწვდომი.

რა დახვდებათ აქ მოსულ ბავშვებსა და მშობლებს, რა უპირატესობა აქვს ახალ განყოფილებას და რამდენად სრულად მოიცავს ის პედიატრიულ სერვისებს — ამ საკითხებზე თოდუას კლინიკის პედიატრი, თეა აბჟანდაძე საუბრობს.

რა მომსახურებებს მოიცავს თოდუას კლინიკის პედიატრიული განყოფილება?

თოდუას კლინიკის ახალ ფილიალში 0-18 წლამდე ასაკის ბავშვების სრული ამბულატორიული მომსახურების მიღებაა შესაძლებელი. კლინიკა აღჭურვილია უახლესი და თანამედროვე სადიაგნოსტიკო საშუალებებით, რომელთა დახმარებითაც შესაძლებლობა გვაქვს ბავშვის ჯანმრთელობის სრული მონიტორინგი უზრუნველვყოთ, უმოკლეს დროში და დეტალურად გამოვიკვლიოთ ნებისმიერ პრობლემა თუ დაავადება, მაღალი სიზუსტით დავსვათ დიაგნოზი და, შესაბამისად, სწორად დავგეგმოთ მკურნალობა.

ამასთან ერთად, მთელი ამ პროცესისთვის გამოყოფილია ცალკე სივრცე, სადაც ბავშვებისა და მშობლებისთვის მაქსიმალურად კომფორტული და ნაკლებსტრესული გარემოა შექმნილი.

თოდუას კლინიკაში მოქმედებს Check Up პროგრამა, რომელიც საშუალებას აძლევს პაციენტებს ჯანმრთელობის აუცილებელი პროფილაქტიკური სამედიცინო გამოკვლევები ჩაიტარონ და, დაავადების არსებობის შემთხვევაში, საწყის ეტაპზევე აღმოაჩინონ ის. რამდენად იმოქმედებს მსგავსი პროგრამა ბავშვებისთვის?

თოდუას კლინიკაში Check Up პროგრამა ახლა უკვე ბავშვებისთვისაც გახდა ხელმისაწვდომი, რაც მშობლებს შესაძლებლობას მისცემს კიდევ უფრო მარტივად ადევნონ თვალი შვილების ჯანმრთელობის მდგომარეობას. ამ პროგრამის ფარგლებში, ბავშვები გაივლიან ზოგად სამედიცინო შემოწმებას, რუტინულად ჩაუტარდებათ სისხლის, შარდის, განავლის ანალიზები, დიაბეტის სკრინინგი, ფარისებრი ჯირკვლის გამოკვლევა, მუცლის ღრუს ექოსკოპია, განვსაზღვრავთ მიკროელემენტებს სისხლში, D ვიტამინის, კალციუმის დონეებს და ა.შ. კვლევის შედეგები კი დაგვეხმარება დროულად შევამჩნიოთ, თუკი სადმე ნორმის დარღვევაა და მალევე მოვახდინოთ რეაგირება.

ჯანმრთელობის მუდმივი მონიტორინგის მნიშვნელობა, კიდევ უფრო იზრდება, როცა საქმე ბავშვებს ეხებათ? რატომ არის აუცილებელი მათ ზრდა-განვითარებაზე მუდმივი დაკვირვება?

ბავშვები მოზრდილებისგან მთელი რიგი თავისებურებებით განსხვავდებიან. ისინი გარემოსთან ადაპტაციას გადიან, ახასიათებთ ზრდა-განვითარების სწრაფი ტემპი, მეტად სჭირდებათ მინერალები და ვიტამინები, სპეციალური კვება, მათი იმუნური სისტემაც შედარებით უმწიფარია. სწორედ ამ მიზეზები გამო, ბავშვების ზრდა-განვითარებაზე დაკვირვება, მათი ჯანმრთელობის მონიტორინგი კიდევ უფრო მნიშვნელოვანი ხდება, განსაკუთრებით, პირველი ორი წლის განმავლობაში.

მონიტორინგი შესაძლებლობას გვაძლევს თავიდანვე აღმოვაჩინოთ, თუკი ბავშვი რაიმე გენეტიკური დაავადების მატარებელია ან თუ აქვს რაიმე ისეთი პრობლემა, რამაც, შესაძლოა, მისი განვითარება შეაფერხოს. რაც უფრო მალე მოვახდენთ მსგავსი პრობლემების კორექციას, მით უფრო, მარტივად ავიცილებთ თავიდან გართულებებს.

რამდენად მნიშვნელოვანია ამ პროცესში მშობლების ინფორმირება და შესაბამისი ცოდნით აღჭურვა?

მშობლებისთვის აუცილებელი ცოდნის მიწოდება სპეციალისტებისთვის ერთ-ერთი მთავარი პრიორიტეტი უნდა იყოს. ამიტომაც, ჩვენ ვიზიტების დროს, მთელ რიგ საკითხებში მათ ინფორმირებაზე ვზრუნავთ. ვთქვათ, ვაწვდით ცოდნას იმუნიზაციის აუცილებლობაზე, კვების პრინციპებზე, ამა თუ იმ დაავადების ნიშნებზე. ვასწავლით, როგორ შეუქმნან შვილებს უსაფრთხო გარემო, როგორი უნდა იყოს მათი ძილის რეჟიმი და პირობები, რა ჰიგიენური წესები უნდა დაიცვან და ა.შ. ამით მშობლებიც ძლიერდებიან და თავადაც უფრო აქტიურად ერთვებიან შვილების ზრდა-განვითარების პროცესში.

თოდუას კლინიკის პედიატრიული მომსახურებით სარგებლობისათვის, ეწვიეთ მის ვერის ფილიალს იაკობ ნიკოლაძის 10 ნომერში.