აშშ-ის სახელმწიფო მდივნის, ენტონი ბლინკენის განცხადებით, უკრაინის ცის დახურვის ერთადერთი გზა NATO-ს მიერ რუსული თვითმფრინავების ჩამოგდებაა, რამაც, შესაძლოა, ევროპაში სრულმასშტაბიანი ომი გამოიწვიოს. ამის შესახებ მან პრესკონფერენციაზე ისაუბრა.

"ფრენის აკრძალვის მსგავსი ზონის განხორციელების ერთადერთი გზა არის, რომ NATO-ს თვითმფრინავები გაიგზავნოს უკრაინის საჰაერო სივრცეში და ჩამოაგდოს რუსული თვითმფრინავები — რამაც, შესაძლოა, გამოიწვიოს სრულმასშტაბიანი ომი ევროპაში. პრეზიდენტმა ბაიდენმა ნათლად თქვა, რომ ჩვენ არ ვაპირებთ რუსეთთან ომში ჩაბმას", — თქვა მან.

უკრაინა ცის ჩაკეტვას ითხოვს. 3 მარტს უკრაინის პრეზიდენტმა, ვოლოდიმირ ზელენსკიმ NATO-ს ამისკენ კიდევ ერთხელ მოუწოდა. მან პარტნიორებს ჰკითხა — "თუ არ შეგიძლიათ ცის დახურვა ახლა, მაშინ გვითხარით დრო როდის, თუ არ შეგიძლიათ ეს ახლა გააკეთოთ, გვითხარით, რა რაოდენობის ადამიანი უნდა აფეთქდეს?"

ამაზე ისაუბრა NATO-ს გენერალურმა მდივანმა, იენს სტოლტენბერგმაც და აღნიშნა, რომ ალიანსი ომის უკრაინის მიღმა ესკალაციას არ დაუშვებს, შესაბამისად, NATO-ს ჯარები არ შევლენ არც უკრაინის მიწაზე და არც საჰაერო სივრცეში.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში