რუსეთისთვის საჰაერო სივრცეს ამერიკის შეერთებული შტატებიც ხურავს. პრეზიდენტ ჯო ბაიდენის განცხადებით, პუტინი ახლა ბევრად უფრო იზოლირებულია სამყაროსგან, ვიდრე ოდესმე. ბაიდენმა ასევე აღნიშნა, რომ აშშ უკრაინას დამატებით 1 მილიარდ დოლარს გადასცემს.

"დღეს საღამოს ვაცხადებ, რომ ჩვენ შევუერთდებით ჩვენს მოკავშირეებს და ამერიკის საჰაერო სივრცე დაიხურება რუსეთის ყველა ფრენისთვის, რუსეთის შემდგომი იზოლაციისა და მათ ეკონომიკაზე დამატებითი ზეწოლისთვის", — განაცხადა მან.

პრეზიდენტმა სიტყვით გამოსვლისას ასევე თქვა, რომ ოლიგარქებსა და კორუმპირებულ მაღალჩინოსნებს მიზანში ამოიღებს. მისი თქმით, უერთდებიან ევროპელ მოკავშირეებს, რათა "იპოვონ და წაართვან" მათი იახტები, ძვირადღირებული აპარტამენტები, პირადი თვითმფრინავები.

"ამაღამ ვეუბნები რუს ოლიგარქებსა და კორუმპირებულ ლიდერებს, რომლებმაც მილიარდობით დოლარი იშოვეს ამ ძალადობრივი რეჟიმისგან — მეტი აღარ!" — განაცხადა ბაიდენმა.

რუსეთს საჰაერო სივრცე უკვე ჩაუკეტა ევროკავშირმა, ოლიგარქების კერძო თვითმფრინავების ჩათვლით. საჰაერო სივრცის ჩაკეტვას შეუერთდა კანადა და ასევე შვეიცარიაც.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში