ჩრდილოეთ კორეა უკრაინაში ჯარების მასშტაბური კონტინგენტის გაგზავნისთვის ემზადება, რათა უკრაინასთან ომში თავის მოკავშირე მოსკოვს დაეხმაროს. უკრაინის პრეზიდენტის, ვოლოდიმირ ზელენსკის განცხადებით, რუსეთის ტერიტორიაზე შესაძლოა 50 000-მდე ჩრდილოეთკორეელი სამხედრო განთავსდეს. ინფორმაციას Deutsche Welle ავრცელებს.

ივლისის ბოლოს უკრაინის ლიდერმა აღნიშნა, რომ კრემლს ფრონტზე დამატებით 30 000 ჩრდილოეთკორეელის ჩართვა სურდა, თუმცა ბოლო მონაცემებით, ფხენიანმა მ რუსეთში 30 000-დან 50 000-მდე მებრძოლის გაშვების შესახებ მიიღო გადაწყვეტილება. ზელენსკის არ დაუკონკრეტებია, შედის თუ არა ამ რიცხვში ის სამხედროები, რომლებიც უკვე მონაწილეობენ საბრძოლო მოქმედებებში.

უკრაინის პრეზიდენტმა ხაზგასმით აღნიშნა, რომ ფხენიანი თანამედროვე ომის წარმოების ფასდაუდებელ გამოცდილებას იღებს. მან სამხრეთ კორეას მოუწოდა, გააძლიეროს კიევთან თანამშრომლობა საჰაერო თავდაცვისა და უპილოტო საფრენი აპარატების სფეროში.

ზელენსკის განცხადებით, რუსეთმა ჩრდილოეთ კორეისგან დამატებითი ბალისტიკური რაკეტებიც მიიღო, რომლებიც, სავარაუდოდ, ზაპოროჟიეზე განხორციელებული ბოლო იერიშებისას გამოიყენეს.

DW წერს, რომ მოსკოვსა და ფხენიანს შორის თავდაცვის პაქტს ხელი 2024 წლის ზაფხულში მოეწერა, რის შემდეგაც ჩრდილოეთ კორეამ რუსეთში საბრძოლო ნაწილების გაგზავნა დაიწყო.

ანალიტიკოსების შეფასებით, რუსეთში (ძირითადად კურსკის ოლქში) თავდაპირველად 14 000-დან 15 000-მდე სამხედრო გაიგზავნა. მოგვიანებით ფხენიანი დათანხმდა კიდევ 6 000 გამნაღმველისა და სამხედრო მშენებლის გაგზავნას. სამხრეთკორეული და უკრაინული დაზვერვის ცნობით, ჩრდილოეთ კორეამ რუსეთს მილიონობით საარტილერიო ჭურვი და ბალისტიკური რაკეტა მიაწოდა.

სამხრეთ კორეის დაზვერვის მონაცემებით, უკრაინის წინააღმდეგ ომში უკვე დაიღუპა ან დაიჭრა 6 000-მდე ჩრდილოეთკორეელი ჯარისკაცი.